కేసీఆర్, కేటీఆర్‌కు కొత్త ఛాలెంజ్ చేసిన భట్టి

మంత్రి తలసాని శ్రీనివాస్ యాదవ్, సీఎల్పీ నేత భట్టి విక్రమార్క డబుల్ బెడ్ రూంల పర్యటన అర్థంతరంగా ముగిసింది. మొదటి రోజు మూడువేల ఇళ్లు చూసిన భట్టి రెండో రోజు కూడా తలసానితో కలిసి పర్యటించారు. అయితే పర్యటన మధ్యలోనే ఇద్దరి మధ్వ వాగ్వాదం చోటు చేసుకోవడంతో అక్కడ్నుంచి మంత్రి వెళ్లిపోయారు. అయితే గ్రేటర్‌ హైదరాబాద్‌ పరిధిలో ఇళ్లు చూపించమంటే పక్క నియోజకవర్గాల్లో ఇళ్లు చూపిస్తున్నారని భట్టి విక్రమార్క అధికార పార్టీపై మండిపడ్డారు.

దీంతో అసహనం వ్యక్తం చేసి కొల్లూరుకు రావాలంటూ తలసాని అక్కడ్నుంచి వెళ్లిపోయారు. అయితే.. గ్రేటర్‌లో 150 డివిజన్ల పరిధిలో ఎక్కడ చూపించినా వస్తామని భట్టి విక్రమార్క చెప్పారు. నాగారం మున్సిపాలిటీ నుంచి కాంగ్రెస్‌ నేతలు వెనుదిరిగారు. భట్టీ మాత్రం రాంపల్లిలోనే ఆగిపోయారు. ఎవరి దారిన వారు వెళ్లిపోవడంతో రెండో రోజు కొనసాగుతున్న ఇళ్ల పరిశీలన అర్దాంతరంగా ముగిసింది. మరోవైపు తలసాని, మల్లారెడ్డి, మేయర్‌ బొంతురామ్మోహన్‌ మాత్రం కొల్లూరుకు వెళ్లిపోయారు.

Read More: సీఎం కేసీఆర్ నివాసం ఎదుట ఆటోడ్రైవర్ ఆత్మహత్యాయత్నం

ఈ సందర్భంగా మీడియాతో మాట్లాడుతూ భట్టి అధికార పార్టీపై మండిపడ్డారు. ఇళ్లు చూపించమంటే ప్రభుత్వం పారిపోయింది. నిన్న చూపిన 3,400 ఇళ్లను తాను లెక్కలోకి పరిగణిస్తున్నానని తెలిపారు. హైదరాబాద్‌లో డబుల్‌ బెడ్‌రూమ్‌ ఇళ్లు కట్టకుండా ఇతర చోట్ల కట్టిన లెక్కలు చూపించి ప్రజల్ని మోసం చేస్తున్నారు. జీహెచ్ఎంసీలు ఇళ్లు చూపించమంటే మహేశ్వరంలో చూపిస్తున్నారన్నారు. 5 నియోజకవర్గాల్లో కేవలం 3,400 ఇళ్లే కట్టారన్నారు. లక్ష డబుల్‌ బెడ్‌రూమ్‌ ఇళ్లు ఎక్కడున్నాయో చెప్పాలని సీఎం కేసీఆర్‌, కేటీఆర్‌కు ఛాలెంజ్‌ చేస్తున్నానన్నారు భట్టి. లక్ష ఇళ్లు నిర్మించే వరకు ప్రభుత్వం వెంట పడతామన్నారు భట్టీ విక్రమార్క. అయితే భట్టి కామెంట్స్‌ను మంత్రి తలసాని తప్పు పట్టారు. ఇళ్లు పూర్తిగా చూడకుండా విమర్శలు చేయకూడదన్నారు.