Hyd: వర్షాలకు భవనంపై పడ్డ భారీ బండరాయి.. సామాన్లన్నీ ధ్వంసం

హైదరాబాద్‌లో శనివారం భారీ వర్షం కురిసిన సంగతి తెలిసిందే. ఈ క్రమంలో నగరంలో ఓ భారీ ప్రమాదం తప్పింది. జూబ్లీహిల్స్ రోడ్ నంబర్ 45లో వర్షం ధాటికి పెద్ద బండ రాళ్లు ఇళ్లపై పడటం భయాందోళన కలిగించింది. స్థానికుల సమాచారం ప్రకారం.. రోడ్ నెంబర్ 44 ఓ కాంట్రాక్టర్ ఎలాంటి జాగ్రత్తలు తీసుకోకుండా 20 అడుగులు ఉన్న కొండను తవ్వాడు. ఇదే సమయంలో భారీ వర్షం కురిసింది. ఒక్కసారిగా పెద్ద బండలతో ఉన్న కొండ కూలి పక్కనే ఉన్న నాలుగు అంతస్థుల భవనంపై బలంగా పడింది. దీంతో ఆ భవనంలో ఫ్లాట్లలో ఉన్న సామగ్రి ధ్వంసమైంది. నాలుగు అంతస్థుల భవనం పూర్తిగా దెబ్బతింది.

ఒక్కసారిగా పెద్దగా శబ్దం రావడంతో భవనంలో ఉన్న వారంతా బయటకు పరుగులు పెట్టారు. భవనం కట్టడం బలంగా ఉండటంతో పెను ప్రమాదం తప్పిందని అందులో నివసించేవారు చెబుతున్నారు. గుత్తేదారు నిర్లక్ష్యం కారణంగానే ఈ ప్రమాదం జరిగిందని బాధితులు ఆరోపిస్తున్నారు. వెంటనే జూబ్లీహిల్స్‌ పోలీసులకు ఫిర్యాదు చేశారు. దీనిపై పోలీసులు కేసు నమోదు చేశారు.

Must Read: undefined

మరోవైపు, తెలంగాణలో రానున్న మూడు రోజుల‌ పాటు తేలికపాటి నుంచి ఒక మోస్తరు వర్షాలు కురిసే అవకాశం ఉందని హైదరాబాద్ వాతావరణ కేంద్రం తెలిపింది. ఉపరితల ద్రోణి ప్రభావంతో శ‌ని, ఆదివారాల్లో అక్కడక్కడ ఉరుములు, మెరుపులతో కూడిన తేలికపాటి నుంచి ఒక మోస్తరు వర్షాలు కురిసే అవకాశం ఉంది. ఒకటి రెండు చోట్ల భారీ వర్షాలు కురిసే అవకాశం ఉందని అధికారులు తెలిపారు. సోమవారం తేలికపాటి నుంచి ఒక మోస్తరు వర్షాలు చాలా చోట్ల కురుస్తాయని అంచనా వేశారు. ఉత్తర బంగాళాఖాతం ప్రాంతంలో సుమారుగా ఆగస్టు 4న అల్పపీడనం ఏర్పడే అవకాశం ఉందని వాతావరణ అధికారులు అంచనా వేశారు.

Must Read: కేసీఆర్ ఫ్యామిలీ నుంచి మరో వ్యక్తి రాజకీయాల్లోకి? అదే సెంటిమెంట్ ఇక్కడ కూడా!