5 సెకన్లలో అటు నుంచి ఇటు.. రూ.1000 బహుమతి.. బైకులతో సాహసాలు

హైదరాబాద్‌లో మరోసారి బైక్ విన్యాసాలు హల్ చల్ చేస్తున్నాయి. ఒకప్పుడు శివారుల్లో ఎక్కడో జరిగే రేసింగులు ఇప్పుడు నగరం నడిబొడ్డున జరుగుతున్నాయి. దీంతో ప్రమాదకర బైక్ విన్యాసాలతో జనం తీవ్ర భయాందోళనకు గురవుతున్నారు. శనివారం అర్ధరాత్రి దాటాక మెహిదీపట్నం- టోలిచౌకీ మార్గంలోని రేతిబౌలి జంక్షన్‌లో కొందరు యువకులు బైక్ రేసింగులకు పాల్పడ్డారు. ట్రాఫిక్‌ కూడలి వద్ద ఉండే బైక్‌ రేసర్‌.. రెడ్‌సిగ్నల్‌ పోయి ఆరెంజ్‌ లైటు రాగానే అవతలి వైపు వెళ్లాలి. మళ్లీ గ్రీన్‌ లైటు పడేలోపు ఇవతలి వైపు రావాలి. ఈ రేస్ అంతా కేవలం ఐదు సెకన్ల వ్యవధిలో చేయాలన్నది పందెం. బెట్ గెలిచిన విజేతకు రూ.1000 బహుమతి ఇస్తారు. అయితే ఈ బెట్టింగులో ఏ మాత్రం తేడా వచ్చినా, బైక్ పట్టు తప్పిన మృత్యువు ఒడిలోకి వెళ్లాల్సిందే.

Read More: మద్యం తాగి బాత్‌రూంలో పడి సాఫ్ట్‌వేర్ ఇంజినీర్ మృతి

ఇటీవలే హైదరాబాద్‌లో బైక్‌ రేసింగ్‌లో పాల్గొన్న యువకులను పోలీసులు అరెస్టు చేశారు. నగరంలోని ఉప్పల్‌ భగాయత్‌ పరిధిలోని జీహెచ్‌ఎంసీ లే అవుట్‌లో తరచు బైక్‌రేసింగ్‌లు జరుగుతున్నాయి. ఈ క్రమంలో ఆదివారం ఉదయం బైక్‌ విన్యాసాలు, రేసింగ్ జరుగుతున్నట్లు పోలీసులకు సమాచారం అందింది. దీంతో పోలీసులు ఘటనా స్థలానికి చేరుకున్నారు. బైక్‌ రేసింగ్‌లో పాల్గొన్న ముగ్గురు యువకులను అరెస్టు చేశారు. వారి బైక్‌లను స్వాధీనం చేసుకున్నారు. నగరంలో బైక్‌ రేసింగ్‌లకు పాల్పడే వారిపై కఠిన చర్యలు తీసుకుంటామని పోలీసులు హెచ్చరించారు.