KCR రిక్వెస్ట్ కాదు వార్నింగ్: బండి సంజయ్ షాకింగ్ కామెంట్స్

తెలంగాణ సీఎం కేసీఆర్‌‌కు బీజేపీ రాష్ట్ర అధ్యక్షుడు బండి సంజయ్ మరోసారి వార్నింగ్ ఇచ్చారు. లాలూ, కరుణానిధికి ఏం జరిగిందో కేసీఆర్ గుర్తు చేసుకోవాలంటూ బీజేపీ నేత వార్నింగ్ ఇచ్చారు. టీఎస్‌పీఎస్‌సీ ఆఫీసు వద్ద బీజేపీ యువ మోర్చా ఆధ్వర్యంలో చేపట్టిన ధర్నాసందర్భంగా.. బీజేవైఎం అధ్యక్షుడు భానుప్రకాష్‌ను పోలీసులు అరెస్ట్ చేశారు. అనంతరం ఆయన్ను నేరుగా పోలీస్ స్టేషన్‌కు తీసుకు వెళ్లకుండా నగరంలోని పలు పోలీస్ స్టేషన్లకు తిప్పుతున్నారు. దీంతో భాను ప్రకాష్‌ను పోలీసులు వెంటనే విడుదల చేయాలని బండి సంజయ్ డిమాండ్ చేశారు.

తాను రిక్వెస్ట్ చేయడం లేదు.. వార్నింగ్ ఇస్తున్నానంటూ బీజేపీ రాష్ట్ర అధ్యక్షుడు ఘాటైన వ్యాఖ్యలు చేశారు. భాను ప్రకాష్ అరెస్ట్ విషయంలో పోలీసులు వ్యవహరిస్తోన్న తీరుపై ఆయన ఆగ్రహం వ్యక్తం చేశారు. భాను ప్రకాష్‌పై చేయి పడితే ఫామ్ హౌస్‌పై చేయి వేయాల్సి ఉంటుందని హెచ్చరించారు.

తెలంగాణలో ఖాళీలను వెంటనే భర్తీ చేయాలని డిమాండ్ చేస్తూ.. టీఎస్‌పీఎస్‌సీ ఆఫీసు వద్ద బీజేపీ యువ మోర్చా ఆధ్వర్యంలో మెరుపు ధర్నా చేపట్టారు. వెంటనే ఉద్యోగాలకు నోటిఫికేషన్లు ఇవ్వాలని, నిరుద్యోగ భృతి చెల్లించాలని బీజేవైఎం డిమాండ్ చేసింది. మంగళవారం చేపట్టిన ఈ ధర్నా సందర్భంగా పోలీసులు, బీజేవైఎం కార్యకర్తల మధ్య వాగ్వాదం జరిగింది. అనంతరం ఆందోళనకారులను పోలీసులు అరెస్ట్ చేశారు.