విజయశాంతి రాజకీయాల్లోకి వచ్చి 23 ఏళ్లు.. వెంకయ్య, అద్వానీలతో అప్పట్లో ఇలా..

సినీ నటి, బీజేపీ నాయకురాలు విజయశాంతి రాజకీయాల్లోకి వచ్చి నిన్నటితో 23 సంవత్సరాలు అయ్యాయి. 23 ఏళ్లు పూర్తి చేసుకుని బుధవారం 24వ సంవత్సరంలోకి అడుగుపెట్టిన సందర్భంగా ఆమె తన ఫేస్‌బుక్ ఖాతా ద్వారా స్పందించారు. సరిగ్గా 23 ఏళ్ల క్రితం తాను బీజేపీలో చేరిన ఫోటోను ఆమె షేర్ చేశారు. మాజీ ప్రధాని వాజ్‌పేయీ, బీజేపీ అగ్రనేత అద్వానీ, ఉపరాష్ట్రపతి వెంకయ్య నాయుడుతో ఓ ప్రెస్ మీట్‌లో ఉన్న ఫొటోను ఆమె పోస్టు చేశారు. ఈ సందర్భంగా తనకు శుభాకాంక్షలు చెప్పిన వారందరికీ విజయశాంతి ధన్యవాదాలు తెలిపారు.

సినీ నటిగా బిజీగా ఉన్న సమయంలోనే ఆమె తొలుత బీజేపీలో చేరారు. ఆ తర్వాత సొంతంగా తల్లి తెలంగాణ అనే పార్టీ పెట్టారు. ఆ తర్వాత కేసీఆర్ పిలుపు మేరకు తెలంగాణ రాష్ట్ర సమితిలో ఆ పార్టీని విలీనం చేశారు. అలా టీఆర్ఎస్‌లో చేరి ఎంపీగా కూడా గెలిచారు. తర్వాత కేసీఆర్‌తో విభేదాలతో కాంగ్రెస్ పార్టీలో చేరారు. తెలంగాణ కాంగ్రెస్ పార్టీ ప్రచార కమిటీ చైర్ పర్సన్‌గా పనిచేసిన విజయశాంతి.. ఇటీవలే తిరిగి బీజేపీ తీర్థం పుచ్చుకున్నారు.

‘‘రాజకీయాలలో నా ప్రయాణం ప్రారంభమై నిన్నటితో 23 సంవత్సరాలు (జనవరి 26, 1998) పూర్తయి 24వ సంవత్సరం మొదలైన సందర్భంగా నాకు అభినందనలు, శుభాశీస్సులు తెలియజేసిన అభిమానులు మరియు శ్రేయోభిలాషులందరికీ వినమ్రపూర్వక ధన్యవాదాలు తెలియజేస్తున్నాను. మీ ఆదరాభిమానాలను ఎప్పటికీ ఇలాగే నిలబెట్టుకోవాలని మనస్ఫూర్తిగా ఆకాంక్షిస్తూ.. కృతజ్ఞతలతో మీ విజయశాంతి’’ అని ట్వీట్ చేశారు.