ఒక్క కిలో కొనలేదు.. నిరూపిస్తే రాజకీయాల నుంచి తప్పుకుంటా.. ఈటల సవాల్

తెలంగాణ ముఖ్యమంత్రి కేసీఆర్‌పై మాజీ సహచరుడు, బీజేపీ ఎమ్మెల్యే ఈటల రాజేందర్ మరోమారు తీవ్రస్థాయిలో విరుచుకుపడ్డారు. ధాన్యం కొనుగోళ్లలో రాష్ట్ర ప్రభుత్వ వైఖరిని ఆయన తప్పుబట్టారు. తెలంగాణ ఏర్పడిన తర్వాత ఒక్క కిలో ధాన్యం కూడా రాష్ట్ర ప్రభుత్వం రైతుల నుంచి కొనలేదని.. కేంద్రమే బియ్యం రూపంలో రైతుల ధాన్యం కొనుగోలు చేస్తోందన్నారు. ఒక్క కిలో కొనుగోలు చేసినట్లు నిరూపించినా తాను రాజకీయాల నుంచి తప్పుకుంటానని ఆయన సవాల్ చేశారు.

కేసీఆర్ సర్కార్ తీరు సొమ్మొకరిది సోకొకరిది అన్నట్లుగా ఉందని ఈటల ఎద్దేవా చేశారు. కోటి ఎకరాలకు నీళ్లిస్తున్నానని గొప్పలు చెబుతున్నాడని.. ఆ కోటి ఎకరాల్లో పండించిన పంటను ఎలా కొనాలో ఆలోచనలేని వ్యక్తి కేసీఆర్ అని ఆయన విమర్శించారు. రాష్ట్రంలో రైతు వేదికలు, శ్మశానవాటికలు కేంద్ర నిధులతోనే నిర్మించారని.. నేడు రైతు వేదికలు ప్రారంభానికి నోచుకోకుండా ధావత్‌లకు అడ్డాలుగా మారిపోయాయని ఆయన అన్నారు. కేసీఆర్ చెప్పేవన్నీ అబద్ధాలేనని.. హుజూరాబాద్ స్ఫూర్తితో రాష్ట్రంలో, కేంద్రంలో బీజేపీని గెలిపించుకోవాలన్నారు.

Also Read: