సికింద్రాబాద్ ఘటనపై సీబీఐతో దర్యాప్తు చేయిస్తాం: ఈటల రాజేందర్

కేంద్రం తీసుకొచ్చిన ‘అగ్నిపథ్’కు వ్యతిరేకంగా సికింద్రాబాద్‌ రైల్వే స్టేషన్‌లో నిర్వహించిన ఆందోళనలు హింసాత్మకంగా మారిన సంగతి తెలిసిందే. ఈ ఘటనపై సమగ్ర విచారణ జరిపించాలని బీజేపీ నేత, హుజురాబాద్ ఎమ్మెల్యే ఈటల రాజేందర్‌ డిమాండ్‌ చేశారు. రాష్ట్ర ప్రభుత్వం విచారణ జరపించకపోతే కేంద్ర ప్రభుత్వం సీబీఐతో దర్యాప్తు చేయిస్తుందని ఆయన అన్నారు. టీఆర్‌ఎస్ ప్రభుత్వమే యువకులను అడ్డం పెట్టుకుని విధ్వంసం సృష్టించిందనే అనుమానం కలుగుతోందని ఆయన అరోపించారు. ‘ఆర్మీ రిక్రూట్‌మెంట్‌ కోసం సన్నద్ధమయ్యే వాళ్లకు దేశ భక్తి ఉంటుంది. ఆర్మీ రిక్రూట్‌మెంట్‌ అభ్యర్థుల ముసుగులో రాజకీయ పార్టీలకు చెందిన వ్యక్తులు చొరబడి విధ్వంసం సృష్టించారు. ఘటనకు కారకులను గుర్తిస్తాం’ అని ఈటల అన్నారు. నాంపల్లిలోని బీజేపీ రాష్ట్ర కార్యాలయంలో శుక్రవారం (జూన్ 17) సాయంత్రం మీడియాతో ఈటల రాజేందర్ మాట్లాడారు.

రాజ్‌ భవన్‌ ముట్టడి, సికింద్రాబాద్‌ ఘటన వెనుక కుట్ర ఉందని ఈటల రాజేందర్ ఆరోపించారు. రాష్ట్ర ప్రభుత్వమే పూర్తి బాధ్యత వహించాలని ఆయన అన్నారు. కేంద్ర ప్రభుత్వ ఆస్తులైనా, రాష్ట్ర ప్రభుత్వ ఆస్తులైనా ప్రజలవేనని.. ఆ ఆస్తులను రక్షించాల్సిన బాధ్యత రాష్ట్ర ప్రభుత్వంపై ఉందని ఈటల అన్నారు. ‘రైల్వే కేంద్ర ప్రభుత్వానికి సంబంధించింది. రాష్ట్రానికి సంబంధం లేదన్నట్లు తప్పించుకుంటోంది’ అని ఈటల ఆరోపించారు.

‘కొవిడ్ కారణంగా దేశవ్యాప్తంగా అన్ని రిక్రూట్‌మెంట్లు ఆలస్యమయ్యాయి. వీటితో పాటు ఆర్మీ రిక్రూట్‌మెంట్ కూడా ఆలస్యమైన మాట వాస్తవమే. 17 నుంచి 23 ఏళ్ల యువతకు ఉపాధితో పాటు క్రమశిక్షణ పెంపొందించేందుకే కేంద్రం అగ్నిపథ్‌ స్కీమ్ తీసుకొచ్చింది. నరేంద్ర మోదీ ప్రభుత్వం దేశ సంక్షేమం, ప్రజానీకానికి అవసరమయ్యే నిర్ణయాలు తీసుకుంటోంది. ప్రజాక్షేత్రంలో పలుకుబడి లేనివాళ్లే అసహనంతో ఇలాంటి చర్యలకు పాల్పడుతున్నారు’ అని ఈటల రాజేందర్‌ అన్నారు.

Also Read:

✦ GHMC చెత్త ఆటోలు మాయం.. ఇదేం ‘చెత్త’?!