హిందువులకు అక్బరుద్దీన్ క్షమాపణ చెప్పాలి: రాజాసింగ్

హిందూ దేవాలయాల అభివృద్ధి గురించి మాట్లాడే హక్కు ఎంఐఎం నేతలకు లేదని బీజేపీ నేత, గోషామహల్ ఎమ్మెల్యే రాజాసింగ్‌ మండిపడ్డారు. పాతబస్తీలోని లాల్ దర్వాజ మహంకాళీ ఆలయాన్ని ఎలా అభివృద్ధి చేసుకోవాలో తమకు తెలుసని వ్యాఖ్యానించారు. ముఖ్యమంత్రి కేసీఆర్‌ ప్రణాళికలో భాగంగానే అక్బరుద్దీన్‌ ఓవైసీ ప్రగతి భవన్‌కు వెళ్లారని ఆయన ఆరోపించారు. ఫేస్‌బుక్‌లో ఓ వీడియో సందేశాన్ని విడుదల చేసిన రాజాసింగ్.. టీఆర్‌ఎస్, ఎంఐఎం పార్టీలపై విమర్శలు గుప్పించారు.

హిందూ వ్యతిరేక మచ్చ తొలగించుకునేందుకు మజ్లిస్ పార్టీ నేతలు ప్రయత్నిస్తున్నారని రాజాసింగ్ ఎద్దేవా చేశారు. గతంలో హిందువులు, గోవులను ఉద్దేశించి చేసిన వ్యాఖ్యలకు క్షమాపణ చెప్పిన తర్వాతే హిందూ దేవాలయాల అభివృద్ధి గురించి అక్బరుద్దీన్ మాట్లాడాలని రాజాసింగ్‌ డిమాండ్‌ చేశారు.

కేసీఆర్‌ ఎంఐఎంకు కాకుండా రాష్ట్రానికి సీఎంగా వ్యవహరించాలని రాజాసింగ్ ఎద్దేవా చేశారు. ముఖ్యమంత్రిని కలవడానికి తమకు మాత్రం సమయం ఇవ్వడంలేదని, అదే ఎంఐఎం నాయకులకు మాత్రం అడగకుండానే సమయం కేటాయిస్తున్నారని ఆయన ఆరోపించారు. నియోజకవర్గ సమస్యలు చెప్పుకోవడానికి ప్రయత్నిస్తుంటే కలవడానికి అవకాశం కల్పించడంలేదని ఆయన ఆరోపించారు.

ఆదివారం (ఫిబ్రవరి 9) ప్రగతి భవన్‌లో సీఎం కేసీఆర్‌ను కలిసిన ఎంఐఎం ఎమ్మెల్యే అక్బరుద్దీన్ ఓవైసీ.. పాతబస్తీలోని లాల్‌ దర్వాజ మహాంకాళి అమ్మవారి ఆలయాన్ని అభివృద్ధి చేయాలని వినతిపత్రం సమర్పించిన సంగతి తెలిసిందే. రూ.10 కోట్లతో ఆలయాన్ని విస్తరించాలని ఆయన కోరారు. మజ్లిస్ పార్టీకి చెందిన కీలక నేత సీఎం కేసీఆర్‌ను హిందూ ఆలయ అభివృద్ధి కోసం కలవడం చర్చనీయాంశంగా మారింది. ముస్లింల పక్షాన పోరాడే ఎంఐఎం.. హిందువుల సమస్యను ముఖ్యమంత్రి దృష్టికి తీసుకురావడం వెనుక మతలబు వేరే ఉందంటూ పలువురు విమర్శల వర్షం కురిపిస్తున్నారు.

Don't Miss: కాలేజీ బస్సు బీభత్సం.. నిర్మాణంలో ఉన్న భవంతి సెల్లార్‌లోకి దూసుకెళ్లి..