RTC Strike: బీజేపీ ధర్నా ఉద్రిక్తం.. లక్ష్మణ్ కంటికి గాయం, నిమ్స్‌లో చికిత్స

ఆర్టీసీ కార్మికులకు మద్దతుగా బ‌స్ భ‌వ‌న్ ఎదుట బీజేపీ చేపట్టిన ధర్నా ఉద్రిక్తతలకు దారితీసింది. శ‌నివారం (అక్టోబర్ 12) మధ్యాహ్నం ఆర్టీసీ క‌ళ్యాణ‌ మండ‌పం నుంచి బ‌స్‌ భ‌వ‌న్ వ‌ర‌కు బీజేపీ శ్రేణులు, ఆర్టీసీ ఐకాస నాయ‌కులు ర్యాలీ చేప‌ట్టారు. అనంతరం బస్ భవన్ ముందు భైఠాయించారు. రంగంలోకి దిగిన పోలీసులు బీజేపీ రాష్ట్ర అధ్యక్షుడు లక్ష్మణ్‌ను అదుపులోకి తీసుకున్నారు.

ఈ క్రమంలో చోటు చేసుకున్న తోపులాట కారణంగా లక్ష్మణ్ కింద పడిపోయారు. ఆయన కంటికి స్వల్ప గాయమైంది. అనంత‌రం చికిత్స కోసం ఆయ‌ణ్ని నిమ్స్‌ ఆస్పత్రికి త‌ర‌లించారు. నిమ్స్‌లో చికిత్స పొందుతున్న లక్ష్మణ్‌ను టీజేఎస్ అధినేత కోదండరామ్, బీజేపీ ఎమ్మెల్యే రాజాసింగ్ తదితర నేతలు, పార్టీ నాయకులు పరామర్శించారు.

Must Read: ఆర్టీసీ సమ్మెపై సీఎం కేసీఆర్ సంచలన నిర్ణయాలు

ఆర్టీసీ కార్మికులకు బీజేపీ అండగా ఉంటుందని లక్ష్మణ్ తెలిపారు. ప్రభుత్వ నిరంకుశ వైఖరికి వ్యతిరేకంగా పోరాటం చేస్తామని ప్రకటించారు. సమ్మెను విచ్ఛిన్నం చేసేందుకు కేసీఆర్ సర్కార్ కుట్రలు పన్నుతోందని ఆరోపించారు. బీజేపీ కార్యకర్తలు, కార్మికులపై పోలీసుల దమనకాండ ప్రదర్శించారని ధ్వజమెత్తారు.

ప్రజాస్వామికంగా పోరాడితే కార్మికుల ఉద్యోగాలు తీసేస్తారా? అని లక్ష్మణ్ ప్రశ్నించారు. ప్రజలు కేసీఆర్‌ను ఉద్యోగం నుంచే తొలగించే రోజులొచ్చాయని మండిపడ్డారు. 50 వేల కుటుంబాలకు అన్యాయం చేసిన ప్రభుత్వాన్ని వదిలే ప్రసక్తే లేదని హెచ్చరించారు. ఆర్టీసీ కార్మికుల డిమాండ్లు పరిష్కరించాలని డిమాండ్ చేశారు. కార్మికులకు న్యాయం జరిగే వరకు ఉద్యమాన్ని ఉధృతం చేస్తామని ప్రకటించారు. ప్రభుత్వ కార్యకలాపాలు స్తంభింపజేస్తామని హెచ్చరించారు.

Must Read: ఏళ్లుగా ఏంటిది.. ఆర్టీసీ సమ్మెపై తమ్మారెడ్డి భరద్వాజ ఆసక్తికర వ్యాఖ్యలు