అగ్గిపెట్టె కొనేందుకు వెళ్లి బాలుడు మిస్సింగ్.. అక్కడే పడి ఉన్న సైకిల్

సూర్యాపేట పట్టణంలో బాలుడు అదృశ్యం అయిన ఘటన స్థానికంగా కలకలం రేపుతోంది. శనివారం సాయంత్రం 5 గంటల ప్రాంతంలో బాలుడు గౌతమ్ టపాసులు కాల్చడానికి అగ్గిపెట్ట కొనుక్కోవడానికి పక్కనే ఉన్న దుకాణం వద్దకు వెళ్లాడు. పట్టణంలోని భగత్ సింగ్ నగర్‌లో నివాసం ఉంటున్న మహేష్, నాగలక్ష్మిల ఒక్కగానొక్క కుమారుడు గౌతమ్. దుకాణం వద్దకు పోయి బాలుడు గంటసేపైనా కూడా తిరిగి రాలేదు. తల్లి వెంటనే అక్కడికి వెళ్లి చూసింది. సైకిల్ అక్కడే పడేసి ఉంది కాని బాలుడు కనపడలేదు. చుట్టుపక్కల వీధుల్లో, తెలిసిన వారి ఇళ్లలో ఎంత వెతికినా కూడా బాలుడి ఆచూకీ లభ్యం కాలేదు.

దీంతో తల్లిదండ్రులు కన్నీరు మున్నీరుగా విలపిస్తున్నారు. వెంటనే ఆ బాలుడి తల్లిదండ్రులు పోలీస్ స్టేషన్‌లో ఫిర్యాదు చేసారు. ఘటన స్థలానికి చేరుకున్న పోలీసులు దుకాణం యజమానిని స్థానికులను విచారణ చేశారు. చుట్టుపక్కల ఉన్న సీసీటీవీ కెమెరాలను పరిశీలించారు. కానీ, బాలుడు ఎక్కడికి వెళ్లాడనే విషయం మాత్రం తెలియరాలేదు. భూతగదాలు, లేక ఇతర గొడవల కారణంగా ఎవరైనా బాబును ఎత్తికెళ్లారా ఆనే కోణాల్లో పోలీసులు విచారణ చేపట్టారు.