ముగిసిన బీఏసీ సమావేశాలు.. 26 వరకూ అసెంబ్లీ

తెలంగాణ శాసనసభ బిజినెస్ అడ్వైజరీ కమిటీ(బీఏసీ) సమావేశం ముగిసింది. ఈరోజు శాసన సభలో గవర్నర్ ప్రసంగానంతరం బీఏసీ సమావేశమై పలు నిర్ణయాలు తీసుకుంది. ఈ నెల 26 వతేదీ వరకూ సమావేశాలు నిర్వహించాలని నిర్ణయించింది. రెండో రోజు 16న మరణించిన సభ్యులకు సంతాపం, 17న గవర్నర్ ప్రసంగానికి ధన్యవాదాలు తెలుపనున్నారు. అనంతరం ఈ నెల 18న రాష్ట్ర వార్షిక బడ్జెట్‌ను ఆర్థిక మంత్రి హరీష్ రావు సభలో ప్రవేశపెడతారు. మరుసటి రోజు సభకు సెలవు.

అనంతరం 20వ తేదీ నుంచి బడ్జెట్‌పై చర్చ కొనసాగుతుంది. మరుసటి రోజు 21 ఆదివారం సెలవు. సోమవారం 22వ తేదీ నుంచి 26వ తేదీ వరకూ సమావేశాలు కొనసాగుతాయి. చివరిరోజున అప్రాప్రియేషన్ బిల్లు ప్రవేశపెడతారు. సభ్యుల సంఖ్యకు అనుగుణంగా మాట్లాడే సమయం కేటాయిస్తామని స్పీకర్ పోచారం శ్రీనివాసరెడ్డి తెలిపారు. ఈ సమావేశానికి శాసనసభ వ్యవహారాల మంత్రి వేముల ప్రశాంత్ రెడ్డి, సభ్యలు హరీష్ రావు, సింగిరెడ్డి నిరంజన్ రెడ్డి, కొప్పుల ఈశ్వర్, గంగుల కమలాకర్, దాస్యం వినయ్ భాస్కర్, గొంగడి సునీత, కాంగ్రెస్ పార్టీ ప్రతినిధి మల్లు భట్టి విక్రమార్క, ఎంఐఎం ప్రతినిధి పాషా ఖాద్రి హాజరయ్యారు.


మండలి బీఏసీ అప్డేట్స్..
తెలంగాణ శాసన మండలి చైర్మన్ గుత్తా సుఖేందర్ రెడ్డి ఆధ్వర్యంలో శాసన మండలి బీఏసీ సమావేశం జరిగింది. ఈ నెల 17, 18, 20,22,26 తేదీలలో సమావేశాలు నిర్వహించాలని సమావేశంలో నిర్ణయించారు. సమావేశాలు సజావుగా సాగేందుకు అధికార, ప్రతిపక్ష సభ్యులు సహరించాలని ఆయన కోరారు. శాసన సభ వ్యవహారాల మంత్రి వేముల ప్రశాంత్ రెడ్డి, హోంమంత్రి మహమూద్ అలీ, డిప్యూటీ చైర్మన్ నేతి విద్యాసాగర్, ఛీప్ విప్ బోడకుంటి వెంకటేశ్వర్లు,విప్ భాను ప్రసాద్, ఎమ్మెల్సీ జనార్దన్ రెడ్డి, ఎంఐఎం పార్టీ ఎమ్మెల్సీ జాఫ్రీ, తెలంగాణ లెజిస్లేటివ్ సెక్రెటరీ నర్సింహచార్యులు హాజరయ్యారు.

Also Read: