GHMC బరిలో ఈ అభ్యర్థులు చాలా స్పెషల్.. ఎందుకంటే..

హైదరాబాద్‌లో గ్రేటర్ మున్సిపల్ కార్పొరేషన్ ఎన్నికలకు ప్రచారం జోరుగా సాగుతోంది. ప్రధాన పార్టీలు మేయర్ పీఠాన్ని తామే దక్కించుకోవాలని ఉవ్విళ్లూరుతున్నాయి. ఈ క్రమంలో జీహెచ్ఎంసీ ఎన్నికల్లో కార్పొరేటర్లుగా పోటీ చేస్తున్న ఇద్దరు మహిళలు ఉన్నట్టుండి అందరి దృష్టినీ ఆకర్షించారు. వీరి గురించి జాతీయ మీడియాలో కూడా కథనాలు వచ్చాయి. ఎందుకంటే వీరు సాధారణ కార్పొరేటర్ అభ్యర్థులు మాత్రం కారు. ఆర్థికంగా ఎంతో అడుగు స్థాయిలో ఉన్నారు. ఇలాంటి వీరు ఎన్నికల్లో పోటీ చేస్తుండడం ప్రాధాన్యం సంతరించుకుంది.

ఈ ఇద్దరు మహిళల్లో ఒకరు ఫర్హానా బేగం.. క్యాబ్ డ్రైవర్ భార్య. మరో అభ్యర్థి రేఖ.. బట్టలు ఇస్త్రీ చేస్తుంటారు. తమ ప్రాంతాల్లో గతంలో ఎంతో మంది కార్పొరేటర్లు వచ్చినా సమస్యలు పరిష్కారం కావట్లేదని అందుకే తాము బరిలోకి దిగినట్లు వారు చెప్పుకొచ్చారు. ఇందుకు తమకు తెలంగాణ తెలుగు దేశం పార్టీ అవకాశం కల్పించినట్లు చెప్పారు.

ఫర్హానా బేగం.. ఇంటింటికి తిరిగి ఓట్లడుగుతున్నారు. మన ఏరియా సమస్యను మనమే పరిష్కరించుకుందామని ఆమె పిలుపునిస్తోంది. భర్త రోజూ క్యాబ్ నడిపితే తప్ప ఇల్లు గడవని పరిస్థితి. స్థానికులకు మంచి చేయాలన్న తపన తప్ప... కనీసం నామినేషన్ వేసేందుకు ఖర్చు చేయలేని పరిస్థితి. సోదరుడు, కుటుంబ సభ్యుల అండతో టీడీపీ తరఫున బరిలో నిలిచింది. ప్రచారానికి కావాల్సిన సామగ్రి కోసం ఫర్హానా స్థానికులను జోలెపట్టి అడుగుతున్నారు. వారు కూడా తమకు తోచినంత డబ్బు సమకూర్చుతున్నారు.

బట్టలు ఇస్త్రీ చేసుకొని జీవనం సాగించే రేఖ కూడా చురుగ్గా ప్రచారంలో పాల్గొంటున్నారు. తమ కాలనీ రోడ్లపై ఎప్పుడూ మురుగు నీరు ప్రవహిస్తూ ఉంటుందని, ఇప్పటి వరకూ ఎవరూ పట్టించుకోలేదని ఆమె అన్నారు. అందుకే, టీడీపీ తరపున ఈసారి తానే ఎన్నికల్లో పోటీ చేస్తున్నట్లు చెప్పారు. తనను గెలిపిస్తే స్థానిక సమస్యల పరిష్కారానికి కృషి చేస్తానని అంటున్నారు.

Also Read: undefined

Also Read: undefined