యాప్నగరం

ఎట్ల కనపడుతున్నం.. దమ్ముంటే కేంద్ర ప్రభుత్వాన్ని రద్దు చేయండి: తలసాని

BJP Vs TRS: బీజేపీ, కేంద్ర ప్రభుత్వంపై తెలంగాణ మంత్రి తలసాని (Talasani Srinivas Yadav) తీవ్రమైన వ్యాఖ్యలు చేశారు. కేంద్ర ప్రభుత్వాన్ని రద్దు చేస్తారా అని ప్రశ్నించారు. ప్రధాని మోదీ ప్రవర్తన బాగా లేదని, ముఖ్యమంత్రులు ఆయనకు ఆహ్వానం పలికేందుకు ఎయిర్‌పోర్టులకు ఎందుకు రావడంలేదో ఆత్మపరిశీలన చేసుకోవాలని హితవు పలికారు. రేవంత్ రెడ్డి పైనా విమర్శలు కురిపించారు.

Authored byశ్రీనివాస్ గంగం | Samayam Telugu 27 May 2022, 5:14 pm
మ్ముంటే కేంద్ర ప్రభుత్వాన్ని రద్దు చేయాలని బీజేపీకి మంత్రి తలసాని శ్రీనివాస్ యాదవ్ సవాల్ విసిరారు. ‘ఎన్నికలకు వెళ్లేందుకు మేం సిద్ధమని.. మీరు సిద్ధమా? ప్రధాన మంత్రి మోదీకి ధైర్యం ఉందా?’ అని ప్రశ్నించారు. బేగంపేట వేదికగా గురువారం ప్రధాని నరేంద్ర మోదీ చేసిన వ్యాఖ్యలకు తలసాని కౌంటర్ ఇచ్చారు. శుక్రవారం హైదరాబాద్‌లో మీడియా సమావేశంలో మాట్లాడారు. దేశానికి కేటీఆర్ ప్రాతినిధ్యం చేయబోతున్నారని భయపడుతున్నారా? అని ప్రశ్నించారు. ‘మీ దగ్గర కేంద్ర దర్యాప్తు సంస్థలు ఉన్నాయని భయపడతామా? మీ తాటాకు చప్పుళ్లకు తెలంగాణ గడ్డ మీద పుట్టిన వారెవరైనా భయపడరు’ అని తలసాని అన్నారు.
Samayam Telugu మంత్రి తలసాని శ్రీనివాస్ యాదవ్ (ఫైల్ ఫొటో)
Talasani Srinivas Yadav


హోం మంత్రి అమిత్ షా కుమారుడికి బీసీసీఐకి సబంధం ఏంటని మంత్రి తలసాని ప్రశ్నించారు. తమది కుటుంబ పాలన ఎలా అవుతుందని ఆయన నిలదీశారు. ‘కేటీఆర్ ఏమన్నా నామినేటెడ్‌గా వచ్చిండా? ఆయణ్ని ప్రజలు ఎన్నుకోలేదా? ఆయన పర్‌ఫార్మెన్స్‌కు ప్రపంచమే ఆకర్షితులై, ఇన్వెస్టర్లందరూ ఆయన వైపే వస్తుంటే చూసి తట్టుకోలేకపోతున్నారా?’ అని తలసాని అన్నారు.

‘పొద్దున లేస్తే సాయంత్రం వరకు రోజుకు 10 డ్రెస్సులు మార్చడం తప్పితే దేశానికి ఏం చేశారు?’ అంటూ ప్రధాని మోదీని ఉద్దేశించి మంత్రి తలసాని ఘాటు వ్యాఖ్యలు చేశారు. ‘మీ తాటాకు చప్పుళ్లకు ఎవడూ భయపడడు గుర్తుపెట్టుకోండి. మీరు ఎక్కడిదాకా వెళ్తే మేం అక్కడి దాకా వస్తం’ అన్నారు తలసాని. జాతీయ రాజకీయాలకు సంబంధించి ముఖ్యమంత్రి కేసీఆర్ చేస్తున్న ప్రయత్నాలు తప్పకుండా విజయవంతం అవుతాయని తలసాని శ్రీనివాస్ యాదవ్ అన్నారు.

‘మీ మొఖాలకు ఎక్కడన్నా తెలంగాణ లాంటి వెల్పేర్ ఏ రాష్ట్రంలోనైనా చేసిండ్రా? వరిధాన్యం విషయంలో ఏం డ్రామా చేసిండ్రు? ఇక్కడో కేంద్ర మంత్రి ఉన్నడు. కనీసం సికింద్రాబాద్ పార్లమెంట్ కైనా ఏం చేసిండ్రో చెప్పగలుగుతరా?’ అని తలసాని ప్రశ్నించారు.

‘బండి సంజయ్ మొన్న మాట్లాడిన మాటలకు కోపం చేస్తడనుకున్నా. విచ్చలవిడిగా దేశం మీద వదిలేశారు. ఇష్టమొచ్చినట్లు మాట్లాడుతున్నరు’ అంటూ తలసాని ధ్వజమెత్తారు.

ఎయిర్‌పోర్టులో దిగిన తర్వాత ఒక్క మనిషితోనైనా మాట్లాడారా అంటూ ప్రధాని మోదీని ఉద్దేశించి తలసాని ప్రశ్నించారు. ‘ఒక మాట లేదు.. మంతి లేదు. మమ్మల్నంటే పట్టించుకోలేదు.. సొంత పార్టీ నాయకులను కూడా మాట్లాడించారా? అక్కడికి వచ్చిన కార్పొరెట్ ప్రతినిధులు ఎంత బాధపడ్డరు’ అని తలసాని అన్నారు.

‘మీ నాయకులు మాట్లాడే భాషను కంట్రోల్ చేయాలి. ఏది పడితే అది మాట్లాడొద్దు. ఈ రాష్ట్రానికి ఏం చేస్తరో చెప్పండి. మీ ప్రవర్తనా శైలి ఏమాత్రం బాగాలేదు ప్రధాని గారు. ముఖ్యమంత్రులు ఎందుకు ఎయిర్‌పోర్టుకు వస్తలేరో మీరు ఆత్మపరిశీలన చేసుకోండి. మీ ఇష్టమున్నప్పుడు రమ్మంటే రావడానికి మేం ఎట్ల కనపడుతున్నం’ అని తలసాని అన్నారు.

టీపీసీసీ అధ్యక్షుడు రేవంత్ రెడ్డి పైనా మంత్రి తలసాని విమర్శలు కురిపించారు. ‘ఈ రాష్ట్రానికి రెడ్లే పరిపాలన చేయాల్నట. నిన్నమొన్న ఒకాయన మాట్లాడుతుండు. బీసీలు, ఎస్సీ, ఎస్టీలు దీని గురించి ఆలోచన చేయాలి’ అని తలసాని అన్నారు.
రచయిత గురించి
శ్రీనివాస్ గంగం
శ్రీనివాస్ రెడ్డి గంగం సమయం తెలుగులో సీనియర్ డిజిటల్ కంటెంట్ ప్రొడ్యూసర్‌గా పని చేస్తున్నారు. ఏపీ, తెలంగాణ, జాతీయ, అంతర్జాతీయ అంశాలపై వార్తలు, ప్రత్యేక కథనాలు అందిస్తుంటారు. EJS నుంచి శిక్షణ పొందిన శ్రీనివాస్‌కు జర్నలిజంలో 12 ఏళ్లకు పైగా అనుభవం ఉంది. JNTU నుంచి BTech చేశారు. గతంలో ప్రముఖ పత్రికల్లో వార్తలు, విద్యా సంబంధిత అంశాలు అందించారు.... మరిన్ని చదవండి

తరవాత కథనం

Telugu News App: ఏపీ, తెలంగాణకు సంబంధించిన లేటెస్ట్ అప్‌డేట్స్‌, జాతీయ, అంతర్జాతీయ, ఎడ్యుకేషన్, బిజినెస్, సినిమా, ఆధ్యాత్మికం, స్పోర్ట్స్, వైరల్ కథనాల కోసం తెలుగు సమయం యాప్‌ను డౌన్‌లోడ్ చేసుకోండి.
తాజా వార్తల అప్డేట్ల కోసం Samayam Telugu ఫేస్‌బుక్పేజీను లైక్ చెయ్యండి.