కరీంనగర్‌లో కారు బీభత్సం.. నలుగురికి తీవ్రగాయాలు

కరీంనగర్‌లో సోమవారం ఉదయం ఓ కారు బీభత్సం సృష్టించింది. రాజీవ్ రహదారిపై వేగంగా వెళుతున్న ఓ కారు.. సైకిల్‌ను తప్పించబోయి రోడ్డు పక్కన ఉన్న కిరాణా షాపు పైకి దూసుకెళ్లింది. ఈ ఘటన జిల్లాలోని గన్నేరువరం మండలం గుండ్లపల్లి వద్ద చోటు చేసుకుంది. కారు హైదరాబాద్ నుంచి వెళుతుండగా ఈ ప్రమాదం జరిగింది.

సైకిల్ అడ్డురావడంతో వేగంగా వెళుతున్న కారు అదుపుతప్పి పక్కనే ఉన్న కిరాణాషాపు పైకి సుమారు 6 అడుగుల ఎత్తుకు దూసుకెళ్లింది. ఘటనలో కారు నుజ్జునుజ్జు కాగా , షాపు పూర్తిగా ధ్వసం అయింది. కారుతో సహా అందులోని ఆరుగురు వ్యక్తులు సుమారు 40 నిమిషాలపాటు షాపుపైన ఉన్నారు. వారిలో నలుగురు తీవ్రంగా గాయపడ్డారు.

ఘటనా స్థలానికి వెళ్లిన పోలీసులు జేసీబీ సహాయంతో కారు కిందకి దించారు. క్షతగాత్రులను సమీపంలోని ఆసుపత్రికి తరలించారు. ప్రమాదంలో ఎలాంటి ప్రాణం నష్టం జరగకపోవడంతో ఊపిరి పీల్చుకున్నారు.