తెలంగాణలో అమెజాన్ పెట్టుబడులపై.. చంద్రబాబు కీలక వ్యాఖ్యలు

తెెలంగాణ రాష్ట్రంలో అమెజాన్ సంస్థ భారీ పెట్టుబడులు పెట్టిన విషయం తెలిసిందే. అమెజాన్ వెబ్ సర్వీసస్ దాదాపు 20వేల 700 కోట్లు పెట్టుబడి పెట్టేందుకు ముందుకు వచ్చింది. దీనిపై తెలుగుదేశం పార్టీ అధినేత చంద్రబాబు నాయుడు స్పందించారు. టీడీపీ దూర దృష్టి వల్లే అమెజాన్ వంటి సంస్థలు ఇవాళ హైదరాబాద్ వస్తున్నాయన్నారు చంద్రబాబు. గ్రేటర్‌ హైదరాబాద్ టీడీపీ నేతలతో చంద్రబాబు ఆన్‌లైన్‌ సమావేశం నిర్వహించారు. హైదరాబాద్‌ అభివృద్ధిలో టీడీపీ పాత్రను వివరిస్తూ గ్రేటర్‌ ఎన్నికలకు సిద్ధం కావాలని నేతలకు సూచించారు.

ఈ సందర్భంగా చంద్రబాబు పార్టీ నేతలకు పలు సూచనలు చేశారు. అభివృద్ధి చేసిన చోట ఓటు అడిగే హక్కు టీడీపీకి ఉంటుందని అన్నారు. టీడీపీ హయాంలో జరిగిన సైబరాబాద్‌ నిర్మాణం, తదితర అభివృద్ధి పనులను ప్రజల్లోకి తీసుకెళ్లాలని సూచించారు. డివిజన్‌, బూత్‌కమిటీలను ఏర్పాటు చేసుకోవాలన్నారు. త్వరలో నియోజకవర్గ ఇన్‌చార్జిల నియామకం జరుగుతుందని తెలిపారు. ప్రభుత్వ వైఫల్యాలపై ప్రశ్నించాలని పార్టీశ్రేణులకు చంద్రబాబు సూచించారు.

Read More: జీహెచ్ఎంసీ ఓటర్ల జాబితా విడుదల.. 11వరకు అభ్యంతరాల స్వీకరణ

వర్షాలతో నష్టపోయిన పేదలను ఆదుకోవడంలో టీఆర్ఎస్ ప్రభుత్వ వైఫల్యాలను ఎండగడుతూ పోరాడాలన్నారు. డివిజన్ల వారీగా పట్టున్న నాయకులను ఆహ్వానించి ఎన్నికలకు ప్రణాళిక రూపొందించాలని చంద్రబాబు నేతలకు సూచించారు.
రాబోయే గ్రేటర్‌ ఎన్నికల్లో సత్తా చాటేందుకు టీడీపీ నాయకులు, కార్యకర్తలందరూ సిద్ధం కావాలని ఆయన పిలుపునిచ్చారు. శనివారం గ్రేటర్‌ హైదరాబాద్‌లోని పార్టీ నాయకులతో జూమ్‌ మీటింగ్‌లో మాట్లాడారు.