హుజూర్‌నగర్ టీడీపీ అభ్యర్థిగా చావా కిరణ్మయి.. బాాబు వ్యూహం అదేనా?

హుజూర్‌నగర్ ఉపఎన్నిక కోసం తెలుగుదేశం పార్టీ అభ్యర్థిని ఖరారు చేసింది. చావా కిరణ్మయిని అభ్యర్థిగా ఖరారు చేసింది. టీటీడీపీ అధ్యక్షుడు ఎల్. రమణ ఆదివారం ఆమెకు బీఫారం అందజేశారు. తెలంగాణ అసెంబ్లీ ఎన్నికల్లో టీడీపీ కాంగ్రెస్‌తో పొత్తు పెట్టుకుంది. లోక్ సభ ఎన్నికల్లో పోటీకి దూరంగా ఉంది. దీంతో ఈసారి కూడా హుజూర్‌నగర్‌లో టీడీపీ పోటీ చేయదేమో అనుకున్నారు. కానీ నియోజకవర్గ టీడీపీ నేతలు పోటీ చేద్దామని అధిష్టానం దగ్గర ఒత్తిడి తెచ్చారు. దీంతో చంద్రబాబు పోటీకి సై అన్నారు.

ఈ ఎన్నికలో పోటీ చేయడం ద్వారా తాము కాంగ్రెస్‌తో దోస్తీ చేయడం లేదని.. అన్ని పార్టీలకు సమాన దూరం పాటిస్తున్నామనే సంకేతాలను టీడీపీ ఇస్తుందని భావిస్తున్నారు. కాంగ్రెస్‌ ఇప్పట్లో కోలుకునే అవకాశాలు కనిపించకపోవడంతోనే.. ఈ నిర్ణయం తీసుకున్నారని భావిస్తున్నారు. టీడీపీకి బద్ధశత్రువుగా భావించే హస్తం పార్టీతో దోస్తీ కారణంగా చంద్రబాబు విమర్శలను ఎదుర్కోవాల్సి వచ్చింది.

‘‘ఎన్నో కష్టాలకు ఓర్చి తెలంగాణ తెచ్చుకున్న తర్వాత కూడా ప్రజానీకం ఎన్నో అరాచకాలకు గురవుతోంది. టీడీపీ 1983 నుంచి ప్రజల పక్షాన పోరాడుతోంది. రాష్ట్రంలో అభివృద్ధికి టీడీపీనే కారణం. హుజూర్‌నగర్ ఉపఎన్నికలో నాకు టికెట్ కేటాయించడం ఆనందంగా ఉంది. పార్టీ పునర్వైభవం కోసం కృషి చేస్తా’’ అని టీడీపీ అభ్యర్థి కిరణ్మయి తెలిపారు.

Read Also: హుజూర్‌నగర్ ఉపఎన్నిక.. కేసీఆర్ వ్యూహం అదేనా?

టీఆర్ఎస్ తరఫున సైదిరెడ్డి పోటీ చేస్తుండగా.. కాంగ్రెస్ తరఫున ఉత్తమ్ భార్య పద్మావతి బరిలో దిగుతున్నారు. బీజేపీ తరఫున కోట రామారావు పోటీ చేస్తున్నారు. ఈ ఎన్నికల్లో ఎలాగైనా విజయం సాధించాలని భావిస్తోన్న టీఆర్ఎస్‌.. సీపీఐతో పొత్తు కోసం ప్రయత్నిస్తోంది.

Read Also: హుజూర్‌నగర్‌లో బీజేపీ వ్యూహం బాగుంది..