చిలుకూరులో జటాయువు సైన్యం.. తొలి జటాయువు అతడే!

దేశంలో ఆడ పిల్లలకు రక్షణ లేకుండా పోతుంది. రోజూ ఏదో చోట కామాంధులు అసహాయులైన బాలికలు, యువతులపై అఘాయిత్యాలకు పాల్పడుతూ, దారుణంగా హతమారుస్తున్న ఘటనలు వెలుగు చూస్తున్నాయి. ఇటీవల తెలంగాణలో జరిగిన వరుస అత్యాచార ఘటనలు తీవ్ర భయాదోళనలకు గురి చేశాయి. ఆడపిల్లలను బయటికి పంపాలన్నా, చివరికి ఇంట్లో ఒంటరిగా వదలాలన్నా సంకోచించే పరిస్థితులు దాపురించాయి.

ప్రస్తుతం సమాజంలో నెలకొన్న దారుణ పరిస్థితులపై చిలుకూరి బాలాజీ ఆలయ ప్రధాన అర్చకులు సీఎస్ రంగరాజన్ స్పందించారు. ఇటీవలే హన్మకొండలో హత్యాచారానికి గురైన తొమ్మిది నెలల చిన్నారి కుటుంబాన్ని పరామర్శించిన ఆయన మానవ మృగాల నుంచి ఆడ పిల్లలను రక్షించుకోవడానికి ఒక జటాయువు సైన్యాన్ని ఏర్పాటు చేస్తానని ప్రకటించారు. ఈ మేరకు జటాయువు జయంతి సందర్భంగా మంగళవారం చిలూకూరి బాలాజీ ఆలయం ఆధ్వర్యంలో జటాయువు సైన్యాన్ని ఏర్పాటు చేశారు.

ఈ సందర్బంగా చాలా మంది యువకులు జటాయువు సైన్యంలో చేరుతున్నట్లు ప్రమాణం చేశారు. ఆడపిల్లలపై జరుగుతున్న అత్యాచారాలను అరికట్టడానికి జటాయువు సైన్యం పెరగాల్సిన అవసరం ఉందన్నారు రంగరాజన్. ప్రతి ఒక్కరూ రామాయణంలో సీతను అపహరించుకు వెళ్లే రావణుడితో పోరాడిన జటాయువులా మారి, ఆడ పిల్లలకు రక్షణ కల్పించాలని కోరారు.

తొలి జటాయువుగా నదీమ్..
జటాయువు సైన్యం ఏర్పాటు చేసిన సందర్భంగా రంగరాజన్ తొలి జటాయువుగా కార్వాన్‌కు చెందిన నదీమ్ అనే వ్యక్తిని ఎంపిక చేసి, సన్మానించారు. నెల రోజుల కిందట మొయినాబాద్‌లో గుర్తు తెలియని దుండగులు పదేళ్ల బాలికను స్కూటీపై అపహరించే ప్రయత్నం చేశారు. ఆ బాలిక గట్టిగా కేకలు వేయడంతో నదీమ్.. దుండగులను వెంబడించి బాలికను రక్షించాడు. అనంతరం కిడ్నాపర్లను పోలీసులకు అప్పగించాడు. అందుకే నదీమ్‌ను తొలి జటాయువుగా ఎంపిక చేసినట్లు రంగరాజన్ తెలిపారు.