కేసీఆర్ మరో నిర్ణయం.. హరీశ్, కేటీఆర్‌లకు కీలక బాధ్యతలు

తెలంగాణ సీఎం కేసీఆర్ ఇటీవలే కేబినెట్ విస్తరించిన విషయం తెలిసిందే. కేటీఆర్, హరీశ్ రావులను మంత్రి వర్గంలోకి తీసుకున్న ఆయన కీలక శాఖలైన మున్సిపల్, ఆర్థికంతోపాటు మరికొన్ని శాఖలను వారికి కేటాయించారు. అయితే అసెంబ్లీ సమావేశాల సందర్భంగా హరీశ్ రావు, కేటీఆర్‌‌లతోపాటు మంత్రులకు మరో ముఖ్య బాధ్యతలు అప్పగించారు కేసీఆర్. సమావేశాల్లో తన దగ్గరున్న శాఖలపై విపక్ష సభ్యులు అడిగే ప్రశ్నలకు సమాధానం చెప్పే బాధ్యతలను కట్టబెట్టారు. ఈ మేరకు సాధారణ పరిపాలన శాఖ బుధవారం ఉత్తర్వులు జారీ చేసింది.

కీలకమైన సాగునీటి పారుదల వ్యవహారాలకు సంబంధించి సభ్యులు అడిగే ప్రశ్నలకు సమాధానం చెప్పే బాధ్యతను మంత్రి హరీశ్ రావుకు కట్టబెట్టారు. దీనితోపాటు శాంతి భద్రతలు, సాధారణ పరిపాలనకు సంబంధించిన ప్రశ్నలకు సమాధానం ఇచ్చే బాధ్యతలను కూడా హరీశ్ రావుకే అప్పగించారు.

గనులు, సమాచార, పౌర సంబంధాల శాఖలకు సంబంధించిన బాధ్యతలను కేటీఆర్‌కు, రెవెన్యూ శాఖకు సంబంధించిన బాధ్యతను మంత్రి వేముల ప్రశాంత్ రెడ్డికి అప్పజెప్పారు. మరో మంత్రి తలసాని శ్రీనివాస్ యాదవ్‌కు కమర్షియల్ టాక్స్ శాఖలను కేటాయించారు.