30 ఏళ్ల తర్వాత ఇంట్లో శుభకార్యం.. వాయిదా వేసుకున్న వనమా.. కేసీఆర్ ప్రశంసలు

కరోనా వైరస్ కట్టడి కోసం కఠిన చర్యలు తీసుకోక తప్పదని తెలంగాణ సీఎం కేసీఆర్ స్పష్టం చేశారు. ‘ప్రజలు పోలీసులకు సహకరించకపోతే 24 గంటలు కర్ఫ్యూ పెట్టాల్సి ఉంటుంది, షూట్ ఎట్ సైట్ ఆర్డర్లు ఇవ్వాల్సి ఉంటుంది. అప్పటికీ మాట వినకపోతే ఆర్మీని రంగంలోకి దింపాల్సి ఉంటుంది’ అని సీఎం కేసీఆర్ తెలిపారు. అలాంటి పరిస్థితిని మనం తెచ్చుకోవద్దన్న సీఎం.. జాగ్రత్త ఉంటే సరిపోతుంది కాబట్టి.. ప్రజలు ప్రభుత్వ ఆదేశాలను పాటించాలి. సాయంత్రం 7 గంటల నుంచి ఉదయం 6 గంటల వరకు కర్ఫ్యూ విధిస్తున్నామని ప్రకటించిన ఆయన.. ఆరు గంటలకే షాపులు మూసేయాలన్నారు. లేదంటే షాపుల లైసెన్స్‌లు రద్దు చేస్తామన్నారు.

మంగళవారం రాత్రి మీడియాతో మాట్లాడిన కేసీఆర్.. కొత్తగూడెం ఎమ్మెల్యే వనమా వెంకటేశ్వరరావు తన మనవరాలి పెళ్లిని రద్దు చేసుకున్న విషయాన్ని ప్రస్తావించారు. ‘వనమా వెంకటేశ్వర రావు తన మనవరాలి పెళ్లి కోసం 40 వేల కార్డులను పంచారు. కానీ పరిస్థితిని గమనించి పెళ్లిని వాయిదా వేశారు. ఆయన్ను అభినందిస్తున్నా’ అని కేసీఆర్ వ్యాఖ్యానించారు.

ఏప్రిల్ 4న వనమా మనవరాలి వివాహం జరగనుంది. వనమా ఇంట్లో 30 ఏళ్ల తర్వాత జరుగుతున్న శుభకార్యం ఇది. దీంతో పెళ్లి కోసం భారీ ఎత్తున ఏర్పాట్లు చేశారు. అధికారులు, మంత్రులు, సీఎం కేసీఆర్‌తో పాటు వేలాది మందిని వివాహానికి ఆహ్వానించారు. కానీ తెలంగాణ ప్రభుత్వం లాక్‌డౌన్ ప్రకటించడంతో పెళ్లిని వాయిదా వేయాలని వనమా నిర్ణయించారు. ఈ విషయాన్ని మార్చి 23న భద్రాద్రి కొత్తగూడెం జిల్లా పాల్వంచలోని తన నివాసంలో ప్రకటించారు. కరోనా కట్టడి కోసం ప్రజలందరూ స్వీయ నియంత్రణ పాటించాలని.. ప్రభుత్వానికి సహకరించాలని ఎమ్మెల్యే వనమా పిలుపునిచ్చారు.

మీడియాకు ప్రభుత్వమే అనుమతి ఇచ్చింది: కేసీఆర్
‘‘పోలీసులు, మీడియా మధ్య నిన్న ఘర్షణ తలెత్తిందని తెలిసింది. మీడియా ప్రతినిధులు వెళ్లడానికి అనుమతి ఇచ్చిందే ప్రభుత్వం. కాబట్టి పోలీసులు వారు తిరగడానికి అనుమతి ఇవ్వాలి. మీడియాకు ప్రభుత్వమే అనుమతి ఇచ్చింది, వారిని ఫ్రీగా వదిలేయాలని డీజీపీని కోరుతున్నా’’ అని కేసీఆర్ తెలిపారు.