KCR: హుజూర్‌నగర్‌పై వరాల వర్షం.. కనీవిని ఎరుగని రీతిలో!

హుజూర్‌నగర్‌ నియోజకవర్గం ప్రజలపై సీఎం కేసీఆర్ వరాల జల్లు కురిపించారు. తమ పార్టీ అభ్యర్థికి ఘన విజయం అందించిన ప్రజలకు కేసీఆర్ కృతజ్ఞతలు తెలిపారు. ఓటర్లు నీళ్లేదో, పాలేదో తెలుసుకొని గెలిపించారని కొనియాడారు. అందించిన విజయానికి ప్రత్యేక ప్రతిఫలం దక్కాలని పేర్కొంటూ.. అనేక హామీలు ఇచ్చారు. నియోజకవర్గంలోని ప్రతి గ్రామానికి రూ.20 లక్షలు ప్రకటించారు. ఏడు మండల కేంద్రాలకు ఒక్కో దానికి రూ.30 లక్షల చొప్పున ప్రకటించారు. హుజూర్‌నగర్ మున్సిపాలిటీకి రూ.25 కోట్లు, నేరేడుచర్ల మున్సిపాలిటీకి రూ.15 కోట్లు ప్రకటించారు.

హుజూర్‌నగర్‌లో శనివారం (అక్టోబర్ 26) సాయంత్రం టీఆర్‌ఎస్ పార్టీ ప్రతిష్టాత్మకంగా నిర్వహించిన ‘ప్రజా కృత‌జ్ఞత’ సభలో సీఎం కేసీఆర్ పాల్గొని ప్రసంగించారు. హుజూర్‌నగర్‌లో పాలిటెక్నిక్ కళాశాల, గిరిజన విద్యార్థుల కోసం రెసిడెన్షియల్ పాఠశాల ఏర్పాటు చేస్తామని హామీ ఇచ్చారు. సిమెంట్ ఫ్యాక్టరీలు ఎక్కువగా ఉన్న నియోజకవర్గ కేంద్రంలో ఈఎస్‌ఐ ఆస్పత్రి ఏర్పాటు చేయిస్తామని ప్రకటించారు.

Must Read: సింగరేణిలో బోనస్‌ బొనాంజా.. రూ.లక్షతో కార్మికుల ఇంట పండుగ

హుజూర్ నగర్‌లో రెవెన్యూ డివిజన్ ఏర్పాటు చేస్తామని కేసీఆర్ ప్రకటించారు. పట్టణంలో బంజారా భవన్ ఏర్పాటు చేస్తామని హామీ ఇచ్చారు. హుజూర్‌నగర్‌ చెరువును ట్యాంక్ బండ్ తరహాలో అభివృద్ధి చేస్తామని.. పట్టణంలో రింగు రోడ్డు ఏర్పాటు చేస్తామని తెలిపారు. ప్రజా దర్బార్ ఏర్పాటు చేసి పోడు భూముల సమస్య పరిష్కరిస్తామని కేసీఆర్ హామీ ఇచ్చారు.

మేళ్లచెరువు, చింతలపాలెం మండలాలను హుజూర్‌నగర్‌ కోర్టు పరిధిలోకి తీసుకొస్తామని కేసీఆర్ ప్రకటించారు. హుజూర్‌నగర్ నియోజకవర్గానికి ఎక్కువ మొత్తంలో డబుల్ బెడ్రూం ఇళ్లు మంజూరు చేస్తామని హామీ ఇచ్చారు. 15, 20 రోజుల్లో హుజూర్‌నగర్ నుంచి నాగార్జున సాగర్ వరకు పర్యటిస్తానని తెలిపారు.

హుజూర్‌నగర్ నియోజకవర్గంలో మొత్తం 134 గ్రామాలు ఉన్నాయి. ప్రతి గ్రామ పంచాయతీకి రూ.20 లక్షలు ప్రకటించడం విశేషం. ఈ నిధులన్నింటినీ సీఎం ప్రత్యేక నిధి నుంచి మంజూరు చేస్తామని కేసీఆర్ చెప్పారు. నియోజకవర్గంలో ఇప్పటివరకు ఎలాంటి అభివృద్ధి జరగలేదని కేసీఆర్ విమర్శించారు.

Also Read: హుజూర్‌నగర్‌లో స్వతంత్ర అభ్యర్థి సత్తా.. రైతు సమస్యలపై పోటీ; బీజేపీ, టీడీపీలకు షాక్