కల్నల్ సంతోష్ బాబు సోదరి ఆవేదన.. మనసు కరగాల్సిందే, కళ్లు చెమర్చాల్సిందే!

లడఖ్‌లో చైనా సైనికులతో జరిగిన ఘర్షణల్లో సూర్యాపేటకు చెందిన కల్నల్ సంతోష్ బాబు అమరుడైన సంగతి తెలిసిందే. దేశం కోసం ఆయన వీరమరణం పొందడం పట్ల ఆయన కుటుంబ సభ్యులు ఉద్వేగానికి లోనవుతున్నారు. బదిలీపై హైదరాబాద్ వస్తున్నాడని తెలియగానే ఎంతో ఆనందించాం.. కానీ ఈలోగానే ఇలా జరిగిందంటూ ఆవేదనకు లోనవుతున్నారు. రెండు రోజుల క్రితమే తన పెళ్లి రోజు సందర్భంగా అన్నయ్యతో మాట్లాడానని అదే చివరిసారి అవుతుందని ఊహించలేకపోయానని సంతోష్ బాబు సోదరి శ్రుతి కన్నీటి పర్యంతమయ్యారు. అన్నయ్య కొద్ది సెకన్లు మాత్రమే మాట్లాడారని.. ఎలా ఉన్నావ్ అన్నయ్యా.. అని అడిగితే.. ఇప్పుడే ఏమీ అడగొద్దు.. ఏమీ చెప్పలేనని అన్నాడని ఆమె గద్గద స్వరంతో అన్నారు.

నాన్న కోరిక మేరకు అన్నయ్య ఆర్మీలో చేరాడని శ్రుతి తెలిపారు. అన్నయ్య సైనిక్ స్కూల్‌లో చేరడం కోసమే నాన్న ఆదిలాబాద్ నుంచి విజయనగరం బదిలీ చేయించుకున్నారని చెప్పారు. అక్కడ తెలిసిన వాళ్లెవరూ లేకున్నా... అమ్మానాన్న సపోర్ట్‌తో.. సంతోష్ బాబు ఏడాదిపాటు కష్టపడి సైనిక్ స్కూల్‌ ప్రవేశ పరీక్షలో ఆలిండియా మూడో ర్యాంక్ సాధించాడని ఆమె చెప్పారు.

తర్వాత ఆర్మీలో చేరిన అన్నయ్య ప్రమాదం పొంచి ఉన్న పాకిస్థాన్ సరిహద్దుల్లోనూ పని చేశారని.. రిస్క్ అంతగా లేదని భావించిన చోట ఇప్పుడు ఇలా జరగడం బాధగా ఉందని శ్రుతి వాపోయారు. వదిన, పిల్లల్ని ఎలా ఓదార్చాలో అర్థం కావడం లేదన్న శ్రుతి.. అన్నయ్య తన పిల్లలతో ఎక్కువ సమయం గడపలేకపోయాడన్నారు. అన్నయ్య కొడుకు అనిరుధ్ పప్పా పప్పా అని ఏడుస్తున్నాడని శ్రుతి విలపించారు.