త్యాగాల చరిత్రకు భోగాల చెద! ఎమోషనల్ అయిన రేవంత్ రెడ్డి

కేసీఆర్‌ సర్కార్‌పై ఒంటికాలిపై విరుచుకుపడే టీపీసీసీ వర్కింగ్ ప్రెసిడెంట్, మల్కాజ్‌గిరి ఎంపీ రేవంత్ రెడ్డి కాస్త ఎమోషనల్ అయ్యారు. ఎవని పాలయిందిరో తెలంగాణ అంటూ భావోద్వేగానికి గురయ్యారు. తెలంగాణ కోసం త్యాగాలు చేసిన వారికి అవమానం జరుగుతోందని.. పాలకుల భోగాలతో చరిత్రకు చెద పడుతోందంటూ ఘాటు వ్యాఖ్యలు చేశారు. తెలంగాణ కోసం కాంక్షించి ఉద్యమ స్ఫూర్తిని రగిల్చిన ప్రొఫెసర్ జయశంకర్ సారుకి అవమానం జరుగుతోందంటూ రేవంత్ తీవ్రంగా స్పందించారు.

ప్రత్యేక రాష్ట్ర సాధనే ఊపిరిగా బతికిన ప్రొఫెసర్ జయశంకర్ సార్ మరణానంతరం మృతదేహాన్ని అభిమానుల సందర్శనార్థం హన్మకొండలోని ఏకశిల పార్క్‌ బిల్డింగ్‌లో ఉంచి నివాళులర్పించారు. ఆ సందర్భంగా పార్క్‌ని జయశంకర్ సార్ స్మృతివనంగా మార్చేందుకు నిర్ణయించారు. అందులో భాగంగా నాలుగున్నర కోట్ల రూపాయలతో చేపట్టిన పనులు నేటికీ కొనసాగుతున్నాయి. అయితే జయశంకర్ సార్ స్మృతి వనంలో చెక్కిన చిత్రపటాలపై రేవంత్ ఫైర్ అయ్యారు.

జయశంకర్ సార్ ఫొటోల కంటే సీఎం కేసీఆర్ ఫొటోలే పెద్ద సైజులో ఉండడం.. మహామనిషిని అవమానించడమేనంటూ ఆగ్రహం వ్యక్తం చేశారు. ‘త్యాగాల చరిత్రకు భోగాల చెద! స్వరాష్ట్రం కోసం ప్రాణం ఒదిలినోళ్లు, ప్రాణం పెట్టినోళ్ల చరిత్ర చిన్నబోతోంది. ఉద్యమ మార్గదర్శి జయశంకర్ ‘సారు’ ఒక్కడికే జరిగిన పరాభవం కాదు ఇది. రాష్ట్రమే కాంక్షగా.. ఉద్యమమే శ్వాసగా బతికిన ప్రతి తెలంగాణ బిడ్డకు జరిగిన అవమానం. ‘ఎవని పాలయిందిరో తెలంగాణ...?’’ అంటూ భావోద్వేగంతో ట్వీట్ చేశారు.

Also Read: