Varavara Rao: విరసం నేతను విడుదల చేయించండి.. కేసీఆర్‌కు జీవన్ రెడ్డి లేఖ

మహారాష్ట్రలో జైలు శిక్ష అనుభవిస్తోన్న విరసం నేత వరవరరావుకు కరోనా పాజిటివ్ అని తేలిన సంగతి తెలిసిందే. ఆయన ఆరోగ్యంపై కుటుంబ సభ్యులు ఆందోళన వ్యక్తం చేస్తున్నారు. దీంతో వరవరరావును విడుదల చేయించడానికి చర్యలు తీసుకోవాలని కాంగ్రెస్ ఎమ్మెల్సీ జీవన్ రెడ్డి సీఎం కేసీఆర్‌కు లేఖ రాశారు. తెలంగాణ రాష్ట్ర ఏర్పాటు కోసం వరవరరావు కేసీఆర్‌తో కలిసి ఉద్యమానికి ఊతం ఇచ్చారని.. అలాంటి వ్యక్తి విడుదల కోసం చొరవ చూపాల్సిన బాధ్యత సీఎంకు ఉందని జీవన్ రెడ్డి లేఖలో పేర్కొన్నారు. వరవరరావు విడుదల విషయంలో తెలంగాణ సర్కారు ప్రత్యేక శ్రద్ధ వహించాలంటూ.. కేసీఆర్‌కు పీసీసీ మాజీ చీఫ్ పొన్నాల లక్ష్మయ్య అంతకు ముందే లేఖ రాశారు.

తలోజా జైల్లో ఉన్న వరవరరావు ఆరోగ్యం విషమించడంతో మెరుగైన చికిత్స నిమిత్తం ముంబైలోని జేజే ఆస్పత్రికి జైలు సిబ్బంది తీసుకెళ్లారు. అయితే అక్కడ కరోనా లక్షణాలు కనిపించడంతో వెంటనే పరీక్షలు నిర్వహించారు. దీంతో వరవరరావుకి కరోనా పాజిటివ్‌గా నిర్ధారణ అయింది. ఈ నేపథ్యంలో జేజే ఆస్పత్రి నుంచి సెయింట్ జార్జ్ హాస్పిటల్‌కు చికిత్స నిమిత్తం ఆయన్ను తరలించారు. ఇప్పటికే హైదరాబాద్ నుంచి కుటుంబ సభ్యులు వెళ్లి వరవరరావును కలిశారు.

వరవరరావు ఆరోగ్యంపై ఇప్పటికే కుటుంబ సభ్యులు ఆందోళన వ్యక్తం చేశారు. గత కొన్నాళ్ల నుంచి ఆయన ఆరోగ్యం ఆందోళన కరంగా ఉందని అతనికి వెంటనే మెరుగైన చికిత్స అందించాలని కుటుంబ సభ్యులు కోరుతున్నారు.

మావోయిస్టులతో కలిసి ప్రధాని మోదీ హత్యకు కుట్ర పన్నారన్న అభియోగంపై వరవర రావుతో పాటు మరో నలుగురిని పుణె పోలీసులు 2018 ఆగస్టులో అరెస్టు చేశారు. సుప్రీం కోర్టు ఆదేశాలతో కొన్ని రోజులు వీరిని గృహ నిర్బంధంలో ఉంచిన అధికారులు, ఆ తర్వాత జైలుకు తరలించారు. వరవర రావును మొదట్లో పుణెలోని ఎరవాడ జైలులో ఉంచారు. తర్వాత అక్కడి నుంచి కొన్నాళ్ల కిందట నవీ ముంబైలోని తలోజా జైలుకు తరలించారు.