సీఎం కేసీఆర్‌కు కాంగ్రెస్ సీనియర్ నేత లేఖ

తెలంగాణ ముఖ్యమంత్రి కేసీఆర్‌కు కాంగ్రెస్‌ ఎంపీ కోమటిరెడ్డి వెంకట్‌రెడ్డి లేఖ రాశారు. తెలంగాణలో కౌలు రైతులు పడుతున్న కష్టాలను సీఎం కేసీఆర్‌ పట్టించుకోవడం లేదని ఆయన లేఖలో పేర్కొన్నారు. టీఆర్‌ఎస్‌ పాలనలో కౌలు రైతులు ఉరికొయ్యలకు వేలడాల్సిన పరిస్థితి నెలకొందని ఆ లేఖలో కోమటిరెడ్డి పేర్కొన్నారు. పాక్‌ బుక్‌ ఉన్న రైతులకు అరకొర డబ్బులు ఇస్తున్న ప్రభుత్వం.. కౌలు రైతులను అసలు పట్టించుకోవట్లేదని ఆరోపణలు చేశారు. రాష్ట్రంలో అసలు కౌలు రైతుకు గుర్తింపే లేదని మండిపడ్డారు కోమటిరెడ్డి.

కౌలు రైతులకు ప్రభుత్వం సాయం చేయకపోవడంతో..వాళ్లు అప్పుల పాలు అవుతున్నారని ఆవేదన వ్యక్తం చేశారు. కౌలు రైతులు ఆత్మహత్యలు చేసుకుంటుంటే ఎందుకు పట్టించుకోవట్లేదని సీఎం కేసీఆర్‌ను ప్రశ్నించారు. ఇక నుంచి అయినా... కౌలు రైతులకు రైతుబంధు పథకం అమలు చేయాలని డిమాండ్‌ చేశారు కోమటిరెడ్డి. అలాగే మృతి చెందిన రైతు కుటుంబాలకు రూ. 10 లక్షల చొప్పున ఎక్స్‌గ్రేషియా ఇవ్వాలని డిమాండ్‌ చేశారు.