AICC: కేంద్ర, రాష్ట్ర ప్రభుత్వాలపై పోరుబాట... నేడు తెలంగాణలో కాంగ్రెస్‌ పార్టీ ధర్నాలు

కేంద్రంలోని బీజేపీ, తెలంగాణలోని టీఆర్ఎస్ ప్రభుత్వాలు అనుసరిస్తున్న ప్రజా వ్యతిరేక నిర్ణయాలకు నిరసనగా కాంగ్రెస్ పార్టీ(Congress Party) ఆందోళన బాట పట్టింది. ఏఐసీసీ(AICC) పిలుపు మేరకు శుక్రవారం రాష్ట్రవ్యాప్తంగా అన్ని జిల్లాలు, నియోజకవర్గ కేంద్రాల్లో ధర్నాటు చేపట్టనుంది. ఈ కార్యక్రమ వివరాలను ఏఐసీసీ కార్యక్రమాల అమలు కమిటీ రాష్ట్ర ఛైర్మన్‌ మహేశ్వర్‌రెడ్డి, పీసీసీ కార్యనిర్వాహక అధ్యక్షుడు మహేష్‌ కుమార్‌గౌడ్‌ గురువారం ప్రకటించారు.

హైదరాబాద్‌లో ఇందిరాపార్కు వద్ద ఉదయం 10 నుంచి సాయంత్రం 5 గంటల ధర్నా చేపట్టేందుకు అనుమతి కోరామని మహేశ్వరర్‌రెడ్డి, మహేష్‌కుమార్ గౌడ్ తెలిపారు. ఒకవేళ పోలీసులు అనుమతి ఇవ్వకపోతే ‘ఛలో రాజ్‌భవన్’ చేపడతామని తెలిపారు. చమురు ధరలు, నిత్యావసర ధరల పెరుగుదల, జీఎస్టీ పెంపు, అగ్నిపథ్, నిరుద్యోగం, తెలంగాణ వరదల బీభత్సం, ఇతర ప్రజా సమస్యలపై ఏఐసీసీ పిలుపులో భాగంగా ఈ ధర్నా చేపడుతున్నట్లు తెలంగాణ కాంగ్రెస్ పార్టీ వర్గాలు చెబుతున్నాయి. ఈ నిరసన కార్యక్రమాల్లో పార్టీ శ్రేణులు అధిక సంఖ్యలో పాల్గొని విజయవంతం చేయాలని పిలుపునిచ్చారు.