TPCC Chief ఎంపిక.. కాంగ్రెస్‌కు షాకిచ్చేందుకు సిద్ధమైన వీహెచ్!

టీపీసీసీ చీఫ్ ఎంపిక వ్యవహారం కాంగ్రెస్ అధిష్టానానికి పెద్ద తలనొప్పిగా మారింది. ఉత్తమ్ ఎప్పుడో ఆ పదవికి రాజీనామా చేసినప్పటికీ.. అనవసరంగా తుట్టెను ఎందుకు కదల్చడమనే ఉద్దేశంతో.. కాంగ్రెస్ పెద్దలు ఆయన్నే ఆ బాధ్యతల్లో కొనసాగించారు. కానీ దుబ్బాక ఉపఎన్నిక, జీహెచ్ఎంసీ ఫలితాల్లో కాంగ్రెస్ పాతాళానికి పడిపోవడంతో ఉత్తమ్ మరోసారి రాజీనామా చేశారు. దీంతో కొత్త చీఫ్ ఎంపిక కాంగ్రెస్‌కు తప్పలేదు.

ఉత్తమ్ రాజీనామా చేసి నెల రోజులు దాటినప్పటికీ.. కొత్త చీఫ్ ఎంపిక ప్రక్రియ ఓ పట్టాన తేలడం లేదు. రేవంత్ రెడ్డి, కోమటి రెడ్డి వెంకటరెడ్డి ఈ రేసులో ముందున్నారు. కానీ తాను భవిష్యత్తులో బీజేపీలో చేరతానంటూ వెంకటరెడ్డి సోదరుడు కోమటిరెడ్డి రాజగోపాల్ రెడ్డి బాంబు పేల్చారు. దీంతో రేవంత్ వైపు మొగ్గు కనిపించే పరిస్థితి కనిపిస్తోంది.

కాగా రేవంత్‌కు పీసీసీ పగ్గాలు అప్పగిస్తే.. తాను పార్టీలో కొనసాగబోనని సీనియర్ నేత వీహెచ్ ఇప్పటికే హెచ్చరించారు. చాలా మంది నేతలు కూడా ఇలాగే చేస్తారన్నారు. రేవంత్ రెడ్డికి తప్ప ఎవరికి పీసీసీ చీఫ్ పదవి ఇచ్చినా ఓకేనంటూ వీహెచ్.. ఒకవేళ తను వద్దంటున్న వ్యక్తికే ఆ బాధ్యతలు అప్పగిస్తే.. పార్టీ మారేందుకు సన్నద్ధం అవుతున్నారు.

Read Also: నాపై 72 కేసులు.. రోజూ నాంపల్లి కోర్టు చుట్టూ తిరుగుతున్నా: రేవంత్

లోయర్ ట్యాంక్‌బండ్‌లో ఆదివారం జరిగిన మున్నూరుకాపు మహాసభలో పాల్గొన్న వీహెచ్.. సీఎంను పొగడ్తలతో ముంచెత్తారు. ముఖ్యమంత్రి కేసీఆర్ అన్ని కులాలను ప్రోత్సహిస్తున్నారంటూ ప్రశంసగు గుప్పించారు. కుల సంఘం భవన నిర్మాణం కోసం ప్రతి కులానికి రూ. 5 కోట్లు కేటాయిస్తున్నారని, ఇది మంచి విషయమన్నారు. గతంలో ఏ ముఖ్యమంత్రి కూడా కుల సంఘాలకు ఇంతటి ప్రాధాన్యం ఇవ్వలేదన్నారు.

రేవంత్ రెడ్డికి పీసీసీ పగ్గాలు దక్కితే.. తాను పార్టీలో ఉండన్న వీహెచ్.. తాజాగా కేసీఆర్‌పై ప్రశంసలు కురిపించడం ప్రాధాన్యం సంతరించకుంది. ఆయన టీఆర్ఎస్‌లో చేరే అవకాశం ఉందనే చర్చ మొదలైంది. కేసీఆర్‌ను ప్రశంసించడానికి ఇదే కారణం కావచ్చని భావిస్తున్నారు. మీరు టీఆర్ఎస్‌లో చేరబోతున్నారా అని మీడియా ప్రశ్నించగా.. తాను ఇప్పుడే స్పందించనంటూ ఆయన తెలివిగా బదులిచ్చారు. తాను టీఆర్ఎస్‌లో చేరబోతున్నారనే వార్తలను ఖండించబోనన్నారు. గాంధీ కుటుంబానికి విధేయుడైన వీహెచ్ పార్టీ మారితే నిజంగా సంచలనమే అవుతుంది.