కొడుకును కరోనా బలితీసుకుందని.. మనోవేదనతో తల్లి మృతి

కరోనా వైరస్ కారణంగా కుమారుడు చనిపోగా.. తీవ్ర మనోవేదనకు లోనైన అతడి తల్లి మూడు రోజుల వ్యవధిలోనే మరణించిన విషాద ఘటన హైదరాబాద్‌లోని ఉప్పుగూడలో చోటు చేసుకుంది. వివరాల్లోకి వెళ్తే.. వినాయక నగర్‌కు చెందిన హోంగార్డ్ ఇటీవల కరోనా బారిన పడగా.. చికిత్స పొందుతూ జూన్ 15న ప్రాణాలు కోల్పోయాడు. దీంతో అతడి భార్య, తల్లి, ముగ్గురు పిల్లలకు చార్మినార్ యునాని హాస్పిటల్‌లో కరోనా టెస్టులు చేయగా రిపోర్టులు ఇంకా రాలేదు.

కళ్ల ముందే కొడుకు చనిపోయాడనే బాధతో 75 ఏళ్ల వృద్ధురాలైన అతడి తల్లి కూడా కన్నుమూసింది.. బుధవారం రాత్రి నిద్రకు ఉపక్రమించిన ఆమె.. నిద్రలోనూ చనిపోయింది. కరోనాతో కుమారుడు చనిపోవడం, మూడు రోజుల్లోనే అతడి తల్లి కూడా మరణించడంతో కుటుంబీకులు తీవ్ర విషాదంలో మునిగిపోగా.. కాలనీ వాసులు విచారం వ్యక్తం చేశారు.