కిడ్నీ సమస్యతో వస్తే కరోనా చికిత్స.. ఆస్పత్రి ఎదుట బాధితుడి తల్లి ఆందోళన

కిడ్నీలు విఫలమై ఆస్పత్రికి వస్తే కరోనా వైరస్ సోకిందని చికిత్స చేశారని సికింద్రాబాద్‌లోని ఓ కార్పొరేటు ఆస్పత్రి ఎదుట ఓ రోగి కుటుంబ సభ్యులు ఆందోళన చేపట్టారు. తొలుత బాధితుడికి కిడ్నీ సమస్య ఉందని వైద్యులు చెప్పారని, మూత్రపిండాన్ని దానం చేస్తే పూర్తిగా నయం చేయొచ్చని చెప్పారని కుటుంబ సభ్యులు వాపోయారు. తాను ఓ కిడ్నీ ఇచ్చేందుకు సిద్ధంగా ఉన్నానని బాధితుడి తల్లి చెప్పారు. ఈ చికిత్స కోసం ఇప్పటికే రూ.4 లక్షలు కట్టించుకున్నారని తెలిపారు. ఆ తర్వాత ఇప్పుడు కరోనా సోకిందని చెబుతున్నారని ఆమె ఆస్పత్రి ఎదుట ఆందోళన చేపట్టారు. ఆస్పత్రి వ్యవహారం సరిగ్గా లేదంటూ సిబ్బందిపై ఆరోపణలు చేశారు. రూ.5 లక్షలు కడితేనే రోగిని చూసేందుకు అనుమతిస్తామని యాజమాన్యం తేల్చి చెప్పిందని కుటుంబ సభ్యులు ఆవేదన వ్యక్తం చేశారు.

జగిత్యాల జిల్లా కోరుట్లకు చెందిన వీరు నిరుపేదలని, అలాంటి వారి నుంచి రూ.లక్షల్లో డబ్బు డిమాండ్ చేస్తున్నారని ఆ కుటుంబంలోని మరో వ్యక్తి ఆరోపించారు. ఇప్పటికే కట్టిన రూ.4 లక్షలు కూడా అప్పు చేసి తెచ్చినట్లు వివరించారు. కిడ్నీలు విఫలమైన వ్యక్తికి ఉన్నట్టుండి కరోనా సోకిందని చెబుతున్నారని, బాధితుడిని తల్లి చూసేందుకు కూడా అనుమతివ్వడం లేదంటూ ఆందోళన చేపట్టారు.