తెలంగాణ పల్లెల్లో కరోనా డేంజర్ బెల్స్.. 1500 గ్రామాల్లో కేసులు, పరిస్థితి ఇలాగే కొనసాగితే..!?
తెలంగాణ జిల్లాల్లో కరోనా వైరస్ డేంజర్ బెల్స్ మోగిస్తోంది. కొద్ది వారాల క్రితం హైదరాబాద్ పరిసర ప్రాంతాలకే పరిమితమైన వైరస్ వ్యాప్తి.. ఇప్పుడు గ్రామాలకు పాకుతోంది.
Samayam Telugu3 Aug 2020, 7:04 am
కొద్ది వారాల క్రితం వరకు హైదరాబాద్ పరిసర ప్రాంతాలకు మాత్రమే పరిమితమైన కరోనా మహమ్మారి ప్రస్తుతం పల్లెల్లో అడుగుపెడుతోంది. జూన్ నెలలో తెలంగాణలో నమోదైన కేసుల్లో హైదరాబాద్, పరిసర ప్రాంతాల్లోని కేసులే ఎక్కువ ఉండగా.. ప్రస్తుతం కరీంనగర్, వరంగల్, మహబూబ్నగర్ తదితర జిల్లాల్లోనూ భారీ సంఖ్యలో కేసులు నమోదవుతున్నాయి. రాష్ట్రంలో ఇప్పటికే 270 మండలాలు, 1500 గ్రామాల్లోకి కోవిడ్ మహమ్మారి అడుగుపెట్టింది. ఇదే తీరు కొనసాగితే త్వరలోనే కరోనా బారిన పడిన గ్రామాల సంఖ్య భారీగా పెరిగే ప్రమాదం ఉంది. ఇప్పటి వరకూ పట్టణాల కంటే గ్రామాలు సేఫ్ అనే భావన ఉంది. కానీ పెళ్లిళ్లు, ఫంక్షన్లు, వ్యవసాయ పనుల నిమిత్తం గ్రామీణ ప్రజలు ఎక్కువ మందితో కలవాల్సి వస్తోంది. కరోనా భయంతో హైదరాబాద్ నుంచి సొంతూళ్లకు వచ్చిన వారితోనూ వైరస్ గ్రామాల్లో విస్తరిస్తోంది. ఇది కోవిడ్ వ్యాప్తికి దారి తీస్తోంది.
ఇలాగే కొనసాగితే..
వైరస్ వ్యాప్తి ఇదే రీతిలో కొనసాగితే ఆగష్టు నెల ముగిసే నాటికి రాష్ట్రంలోని మరో 5 వేల గ్రామాల్లో వైరస్ చేరే ప్రమాదం ఉందని ఆరోగ్య శాఖ అంచనా. దీంతో పల్లె ప్రాంతాల్లో కరోనా కట్టడికి పటిష్టమైన చర్చలు చేపట్టాలని ఆరోగ్య శాఖ ప్రభుత్వాన్ని కోరింది. భూపాలపల్లి, ఆదిలాబాద్, ఆసిఫాబాద్, నారాయణపేట, నిర్మల్, వికారాబాద్, వనపర్తి, యాదాద్రి భువనగిరి జిల్లాల్లో మాత్రమే కోవిడ్ కేసుల సంఖ్య కాస్త తక్కువగా ఉంటోంది. మిగతా జిల్లాల్లో కేసులు ఎక్కువ సంఖ్యలోనే నమోదవుతున్నాయి.
అన్ని జిల్లాల్లోనూ కేసులు
తెలంగాణ హెల్త్ బులిటెన్ను పరిశీలిస్తే.. ప్రతి రోజూ అన్ని జిల్లాల్లో కరోనా కేసులు నమోదవుతున్నాయి. 3-4 జిల్లాల్లో మాత్రమే సింగిల్ డిజిట్లో కేసులు ఉంటున్నాయి. మిగతా జిల్లాల్లో రెండంకెల్లో కరోనా కేసులు నమోదవుతున్నాయి. భద్రాద్రి కొత్తగూడెం, సిరిసిల్ల, సిద్ధిపేట లాంటి జిల్లాల్లోనూ కేసుల సంఖ్య వేగంగా పెరుగుతోంది. జిల్లాల్లో కరోనా ప్రమాద ఘంటికలు మోగుతుండటంతో ప్రజలు ఆందోళన చెందుతున్నారు.
టెస్టులకు టోకెన్లు?
మరోవైపు రాష్ట్రంలో సరిపడా కరోనా టెస్టులు చేయడం లేదనే ఆరోపణలు ఉన్నాయి. హైదరాబాద్ నగరంలో టెస్టుల సంఖ్య పెంచాలని కేంద్ర మంత్రి కిషన్ రెడ్డి తెలంగాణ ప్రభుత్వానికి సూచించారు. కరోనా కట్టడిలో ఢిల్లీని ఆదర్శనంగా తీసుకోవాలని ఆయన సూచించారు. కాగా జిల్లాల్లో కరోనా టెస్టులకు చాలా సమయం పడుతుందని బాధితులు వాపోతున్నారు. ఆరోగ్య కేంద్రానికి వెళ్లి లక్షణాలు ఉన్నాయని చెబితే.. టోకెన్ ఇచ్చి మూడు నాలుగు రోజుల తర్వాత టెస్టులకు రావాలని చెబుతున్నారని సమాచారం. ఈలోగా పరిస్థితి విషమించే ప్రమాదం ఉందనే ఆందోళనలో బాధితులు ఉంటున్నారు.
ఏపీతో పోలిస్తే తక్కువ టెస్టులు
పొరుగున ఉన్న ఏపీతో పోలిస్తే తెలంగాణలో కరోనా టెస్టులు చాలా తక్కువగా చేశారు. ఢిల్లీ లాంటి రాష్ట్రాలు ట్రేసింగ్, టెస్టింగ్, ట్రీట్మెంట్ విధానాన్ని అనుసరించి భారీ సంఖ్యలో టెస్టులు చేసి.. కరోనాను అదుపు చేయగలిగాయి. మరోవైపు ఏపీలోనూ కరోనా టెస్టుల సంఖ్య 20 లక్షలు దాటింది. కానీ తెలంగాణలో మాత్రం ఆగష్టు 2 నాటికి 4.77 లక్షల టెస్టులు మాత్రమే చేశారు. ఏపీలో కరోనా బాధితుల సంఖ్యతో పోలిస్తే తెలంగాణలో బాధితుల సంఖ్య కూడా తక్కువగా ఉంది. కానీ టెస్టులు పెంచితే ఇక్కడ కూడా భారీగా కేసులను గుర్తించొచ్చని ప్రతిపక్షాలు చెబుతున్నాయి.
టెస్టుల సంఖ్య, పడకలు పెంచాలి
కేసీఆర్ సర్కారు మరో 4-5 లక్షల ర్యాపిడ్ యాంటీజెన్ టెస్టు కిట్లను తెప్పిస్తున్నట్లు ప్రకటించింది. ఈ కిట్లను కలుపుకున్నా.. ప్రస్తుతం ఆంధ్రా చేసిన టెస్టుల్లో సగం మాత్రమే తెలంగాణ చేయగలుగుతుంది. పల్లెల్లోకి కరోనా ప్రవేశిస్తుండటం, టెస్టులకు సమయం పడుతుండటంతో జనం తీవ్ర ఆందోళన చెందుతున్నారు. ప్రస్తుతం జీహెచ్ఎంసీ పరిధిలో కాకుండా జిల్లాల్లో ప్రభుత్వ హాస్పిటళ్లు, ఆరోగ్య కేంద్రాల్లో కొవిడ్ బాధితుల కోసం 4,708 పడకలను ప్రభుత్వం అందుబాటులోకి తెచ్చింది. కరోనా కేసులు పెరిగితే ఇవి సరిపోయే అవకాశం లేదు. దీంతో మరింతగా టెస్టులు చేయాలని, పడకల సంఖ్య పెంచాలని, ఆక్సిజన్ అందుబాటులో ఉండేలా చూడాలని ప్రజలు కోరుతున్నారు. రాష్ట్రంలోని 80 శాతం మందికిపైగా కోవిడ్ బాధితుల్లో ఎలాంటి లక్షణాలు కనిపించడం లేదు. ఇది ఓ రకంగా ఉపశమనం కలిగించే అంశం కాగా.. మరో రకంగా చూస్తే.. వీరి ద్వారా ఇతరులకు ఇన్ఫెక్షన్ సోకే ప్రమాదం ఉంది.
We use cookies and other tracking technologies to provide services in line with the preferences you reveal while browsing the Website to show personalize content and targeted ads, analyze site traffic, and understand where our audience is coming from in order to improve your browsing experience on our Website. By continuing to browse this Website, you consent to the use of these cookies. If you wish to object such processing, please read the instructions described in our privacy policy/cookie policy.