ఖమ్మం: స్వీట్‌ షాప్‌లో కార్పొరేటర్ కుమారుడి వీరంగం

ఖమ్మంలో ఓ కార్పొరేటర్ కుమారుడు రెచ్చిపోయాడు. ఓ స్వీట్‌షాప్‌లో నానా హంగామా చేశాడు.. యజమానిపై తిరగబడి కర్రతో షాపులో ఉన్న అద్దాలతో పాటూ మిగిలిన ఫర్నీచర్‌ను ధ్వంసం చేశాడు. అడ్డొచ్చిన యజమానిపై దాడి చేసేందుకు ప్రయత్నించాడు ఈ సీన్ మొత్తం సీసీ కెమెరాల్లో రికార్డ్ కావడంతో ఘటన బయటపడింది.

ఖమ్మంకు చెందిన కార్పొరేటర్ కుమారుడు స్వీట్ షాప్‌లోకి వచ్చాడు. కోపంతో ఊగిపోతూ ఓ కర్ర తీసుకొని నేరుగా దూసుకొచ్చాడు. వచ్చీరాగానే షాపులో ఉన్న స్వీట్ డబ్బాలను పగులగొట్టాడు. అడ్డొచ్చిన సిబ్బందిపై తిరగబడ్డాడు.. అతడ్ని అడ్డుకొని షాపులో నుంచి బయటకు తీసుకెళ్లారు. ఆ తర్వాత కూడా అతడు వెనక్కు తగ్గలేదు.. మళ్లీ కర్రతో లోపలికి వచ్చి అద్దాలను ధ్వంసం చేశాడు. షాపు యజమాని అతడ్ని అడ్డుకునే ప్రయత్నం చేయగా.. అతడిపైనా దాడి చేసేందుకు ప్రయత్నించాడు.

కొర్పొరేటర్ కుమారుడి విధ్వంసం మొత్తం సీసీ కెమెరాల్లో రికార్డయ్యాయి. ఈ ఘటనపై ఆరా తీసిన పోలీసులు.. కేసు నమోదు చేసి ఏం జరిగిందో దర్యాప్తు చేస్తున్నారు. గొడవకు దారి తీసిన కారణాలపై ఆరా తీస్తున్నారు. ఈ ఘటనకు సంబంధించిన పూర్తి వివరాలు తెలియాల్సి ఉంది. కార్పొరేటర్ కుమారుడు ఇలా ప్రవర్తించడంపై విమర్శలు వస్తున్నాయి.