సామాజిక దూరం కాదు, ‘భౌతిక దూరం’ అని పిలుద్దాం: కేసీఆర్

కరోనా కట్టడి నియంత్రణ చర్యల్లో భాగంగా విస్తృతంగా ప్రాచుర్యంలోకి వచ్చిన ‘సామాజిక దూరం’ పదంపై సీఎం కేసీఆర్ ఆసక్తికర వ్యాఖ్యలు చేశారు. సామాజిక దూరం అనడం సరికాదని భౌతిక దూరం అని పేర్కొందామని పిలుపునిచ్చారు. రాష్ట్రంలో లాక్‌డౌన్ స్థితిగతులు, కరోనా వ్యాప్తి తదితర అంశాలపై మంగళవారం (మే 5) ప్రగతి భవన్‌లో నిర్వహించిన మంత్రివర్గ భేటీ అనంతరం ఆయన మీడియాతో మాట్లాడారు.

మద్యం షాపుల వద్ద కచ్చితంగా భౌతిక దూరం పాటించాలని సీఎం కేసీఆర్ ఆదేశించారు. పాటించకపోతే ఆ మద్యం షాపులను సీజ్ చేస్తామని హెచ్చరించారు. మాస్కులు కూడా ధరించాలని పేర్కొన్నారు. ‘No Mask, No Liquor; No Mask, No Goods’ అని కేసీఆర్ పిలుపునిచ్చారు. కిరాణా షాపుల్లో సరకులు తీసుకునే వారు, వైన్ షాపుల్లో లిక్కర్ కొనుగోలు చేసేవారు కచ్చితంగా మాస్కులు ధరించాల్సిందేనని స్పష్టం చేశారు.

Must Read: వావ్ అదే స్పిరిట్! వడగండ్లు కురుస్తున్నా చెక్కుచెదరని మద్యంప్రియులు

సామాజిక దూరం అంశంపై సుప్రీంలో పిటిషన్
‘సామాజిక దూరం (Social Distance)’ అంశంపై తెలంగాణకు చెందిన ఓ న్యాయవాది ఇప్పటికే సుప్రీంకోర్టులో పిటిషన్‌ దాఖలు చేశారు. కరోనా వైరస్‌ వ్యాప్తి నియంత్రణకు ప్రజల మధ్య దూరం పాటించాలని చెబుతూ.. దాన్ని ‘సామాజిక దూరం’ అనడం సరికాదని హైదరాబాద్‌కు చెందిన న్యాయవాది బి కార్తీక్‌ నవయాన్‌ భారత సర్వోన్నత న్యాయస్థానాన్ని ఆశ్రయించారు. భౌతిక దూరం పాటించడాన్ని సామాజిక దూరంగా పరిగణించకూడదంటూ ఆయన ఇ-మెయిల్‌, రిజిస్టర్‌ పోస్టు ద్వారా లిఖితపూర్వక పిటిషన్‌ను సుప్రీంకోర్టుకు పంపించారు.

సామాజిక దూరం అనే బదులు భౌతిక దూరం (Physical Distance), వ్యక్తిగత దూరం, డిసీజ్‌ డిస్టెన్సింగ్‌, సేఫ్‌ డిస్టెన్సింగ్‌ పదాలను వాడవచ్చని లాయర్ కార్తీక్ సూచించారు. లేదంటే ఏదైనా కొవిడ్‌-19 గురించి తెలిపేలా పదాన్ని వాడాలని పిటిషన్‌లో అభ్యర్థించారు. ఈ మేరకు కేంద్ర, రాష్ట్ర ప్రభుత్వాలకు ఆదేశాలు ఇవ్వాలని ఆయన కోరారు. దీంతో ఈ అంశం చర్చనీయాంశంగా మారింది.

Also Read: దుబాయ్‌లో కేరళ సేల్స్‌మన్‌కు రూ.20 కోట్ల లాటరీ