తెలంగాణకు చేరిన కరోనా మందు.. మరో 5 రాష్ట్రాలకు కూడా

కరోనా రోగుల చికిత్సలో ఉపయోగించనున్న మందు ‘కొవిఫర్‌’ను తొలి విడతలో భాగంగా ఐదు రాష్ట్రాలకు అందించారు. వీటిలో తెలంగాణ రాష్ట్రం కూడా ఉండడం విశేషం. దేశంలో అత్యధికంగా కరోనా వైరస్‌ కేసులు నమోదవుతున్న మహారాష్ట్ర, ఢిల్లీ, గుజరాత్‌, తమిళనాడు, తెలంగాణ రాష్ట్రాలకు ఈ ఔషధాన్ని పంపారు. తర్వాత బ్యాచ్‌ కరోనా ఔషధాన్ని కోల్‌కతా, ఇండోర్‌, భోపాల్‌, లక్నో, పాట్నా, భువనేశ్వర్‌, రాంచీ, విజయవాడ, కోచి, తిరువనంతపురం, గోవాకు సరఫరా చేయనున్నట్లు తెలుస్తోంది.

అమెరికాకు చెందిన గిలిద్‌ సైన్సెస్‌ అనే సంస్థ రెమ్‌డెసివర్ అనే మందును అభివృద్ధి చేసింది. అయితే, ఈ జనరిక్‌ తయారుచేసి, పంపిణీ చేసేందుకు హైదరాబాద్‌కు చెందిన హెటిరో ల్యాబ్స్‌కు అనుమతి లభించింది. ఈ క్రమంలో హెటిరో తొలివిడతగా 20 వేల వయల్స్‌ను తయారు చేసి, ఆయా రాష్ట్రాలకు అందించింది. మరో రెండు లేదా మూడు వారాల్లో లక్ష వయల్స్‌ తయారు చేయాలని ఆ సంస్థ లక్ష్యంగా పెట్టుకుంది.

Also Read: తెలంగాణ IPS ఆఫీసర్ వీకే సింగ్ రాజీనామా.. గతంలో సర్కార్‌పై సంచలన వ్యాఖ్యలు

అయితే, కొవిఫర్‌ మందు పంపిణీ కేవలం ప్రభుత్వం, ప్రభుత్వాస్పత్రుల ద్వారా మాత్రమే జరగనుంది. మార్కెట్‌లో కొనుగోలు చేసేందుకు మాత్రం ఇప్పుడే లభించబోదని హెటిరో సంస్థ వివరించింది. అత్యవసర స్థితిలో ఉన్న కొవిడ్‌ బాధితుల చికిత్సలో మాత్రమే కొవిఫర్‌ను వాడతారని వెల్లడించింది. ఈ మందు సరాసరిన ఒక్కో కొవిడ్‌ రోగికి కనీసం ఆరు మోతాదులు అవసరం ఉంటుందని సంస్థ వివరించింది.

ఇక ధర విషయానికొస్తే 100 మిల్లీగ్రాముల ఔషధం రూ.5400 అని సంస్థ తెలిపింది. మరోవైపు ఇదే జనరిక్‌ మందును తాము కూడా తయారు చేస్తున్నామని అమెరికా ఫార్మా కంపెనీతో ఒప్పందం కుదుర్చుకున్న సిప్లా ఫార్మా తెలిపింది. ఇంజక్షన్‌ ధర మాత్రం రూ.5000 లోపే ఉంటుందని ఆ సంస్థ చెప్పింది.

Also Read: undefined