Covid Vaccine: కరోనా వ్యాక్సిన్ ధర ఎంతో తెలుసా...?

దేశ ప్రజలంతా ఎంతో ఆసక్తిగా ఎదురు చూసిన కరోనా వైరస్‌ మహమ్మారికి వ్యాక్సిన్ వచ్చేసింది. మరో మూడు రోజుల్లో దేశ వ్యాప్తంగా కరోనా వ్యాక్సినేషన్ ప్రక్కియ ప్రారంభం కానుంది. ఇటు తెలంగాణలో కూడా కరోనాకు వ్యాక్సినేషన్ ప్రక్రియ ఈనెల 16 నుంచి ప్రారంభిస్తున్నారు. ఇప్పటికే వ్యాక్సిన్ సైతం హైదరాబాద్‌తో పాటు తెలంగాణలో పలు జిల్లాలకు చేరవేశారు అధికారులు. సీఎం కేసీఆర్ సైతం వ్యాక్సినేషన్‌కు అన్ని ఏర్పాట్లు పూర్తి చేయాలని అధికారుల్ని ఆదేశించారు.

అయితే సీరమ్ ఇన్‌స్టిట్యూట్ రూపొందించిన కోవిషీల్డ్ వ్యాక్సిన్‌కు ఇప్పటికే దేశవ్యాప్తంగా పంపిణీ మొదలైంది. హైదరాబాద‌కు కోవిషిల్డ్‌తో పాటు.. కోవాగ్జిన్ వ్యాక్సిన్ కూడా పంపిణీకి సిద్ధం చేశారు అయితే వ్యాక్సిన్ వేసుకోవాలనుకుంటే దానికయ్యే ఖర్చెంత? అసలు వ్యాక్సిన్‌ మార్కెట్లో లభ్యమవుతుందా? ఇలా అనేక రకాల సందేహాలు ఉన్నాయి.

Read More: ఓటు వేయకపోతే ఇలా కూడా చేస్తారా.. మూడు నెలలుగా అవన్నీ కట్

కేంద్ర ప్రభుత్వ విజ్ఞప్తి మేరకు వ్యాక్సిన్‌ను లాభాపేక్ష లేకుండా సరఫరా చేస్తున్నామన్నారు సీరమ్ ఇనిస్టిట్యూట్ సీఈఓ అదర్ పూనావాలా. ఒక్కో డోసును కేవలం 2 వందల రూపాయలకే అందిస్తున్నట్లు తెలిపారు. దేశంలోని సామాన్యులు, ఆరోగ్య కార్యకర్తలు, పేదల కోసం తక్కువ ధరకే వ్యాక్సిన్ విక్రయిస్తున్నామన్నారు. అయితే ఈ ధర కేంద్రంకు తొలి దశలో అందించే 10 కోట్ల డోసుల వరకే వర్తించనుంది.

ఆ తర్వాత బహిరంగ మార్కెట్ లో ఒక్కో వ్యాక్సిన్ డోసును వెయ్యి రూపాయలకు విక్రయించనుంది సీరమ్. అవసరం ఉన్న వారు మార్కెట్ లో ఈ ధర చెల్లించి కొనుగోలు చేయాల్సి ఉంటుంది. అటు విదేశాల్లో కూడా కొవిషీల్డ్‌కు భారీగా డిమాండ్ ఉండటంతో నెలకు 70 నుంచి 80 మిలియన్ల డోసులు ఉత్పత్తి చేసేందుకు ప్రణాళికలు చేస్తోంది సీరమ్. మొత్తానికి కరోనా వ్యాక్సిన్ అందుబాటులోకి రావడంతో ప్రజలంతా ఆనందం వ్యక్తం చేస్తున్నారు.