Huzurnagar Bypoll: ‘కారు’కు అడ్డొస్తున్న ‘బస్సు’.. కేసీఆర్‌కు అలా షాక్ తప్పదా?

తెలంగాణ ఆర్టీసీ కార్మికుల సమ్మె ప్రభావం హుజూర్‌నగర్ ఉప ఎన్నికపై పడే పరిస్థితులు కనిపిస్తున్నాయి. కేసీఆర్ తీరుకు నిరసనగా.. ప్రతిపక్షాలు, ప్రజాసంఘాలన్నీ ఆర్టీసీ కార్మికులకు మద్దతుగా నిలుస్తున్నాయి. ఉపఎన్నిక పోరు ప్రారంభం కాగానే.. అధికార టీఆర్ఎస్.. సీపీఐ మద్దతు కోరింది. కాంగ్రెస్ వద్దంటున్నా.. కమ్యూనిస్టు పార్టీ టీఆర్ఎస్‌కు మద్దతు ప్రకటించింది. భవిష్యత్తులోనూ తాము కలిసి పోటీ చేస్తామని గులాబీ నేతలు ప్రకటించారు.

కానీ ఆర్టీసీ కార్మికుల సమ్మెతో సీన్ రివర్స్ అయ్యింది. కార్మికుల పక్షాన పోరాటాలకు మారుపేరైన సీపీఐ.. టీఆర్ఎస్ తీరుపట్ల ఆగ్రహం వ్యక్తం చేస్తోంది. ఆర్టీసీ కార్మికులకు మద్దతు పలికిన సీపీఐ.. హుజూర్‌నగర్ ఉప ఎన్నికలో టీఆర్ఎస్‌కు మద్దతు ఇచ్చే విషయమై పునరాలోచిస్తామని ఇది వరకే ప్రకటించింది.

హుజూర్‌నగర్ ఉపఎన్నికలో టీఆర్ఎస్‌కు మద్దతు ఇచ్చే అంశంపై తేల్చేందుకు సోమవారం సీపీఐ రాష్ట్ర కార్యవర్గం అత్యవసర సమావేశం అవుతోంది. కానీ గులాబీ పార్టీకి తాము మద్దతు ఇవ్వడం లేదని సీపీఐ ఇప్పటికే సంకేతాలు పంపుతోంది.

మంచిర్యాలలో ఆర్టీసీ జేఏసీ శిబిరాన్ని సందర్శించిన చాడ వెంకటరెడ్డి కార్మికులకు సంఘీభావం తెలిపారు. ఈ సందర్భంగా ఆయన మాట్లాడుతూ.. హుజూర్‌నగర్ ఉపఎన్నికలో టీఆర్ఎస్‌కు మద్దతు ఉపసంహరించుకుంటామని తెలిపారు. ఆర్టీసీ కార్మికులకు సంపూర్ణ మద్దతు ఇస్తున్నట్టు ఆయన ప్రకటించారు.

వాస్తవానికి హుజూర్‌నగర్ నియోజకవర్గంలో సీపీఐ బలం పరిమితం. కానీ ఆ పార్టీ మద్దతు కూడగట్టడం ద్వారా నైతికంగా బలం పెంచుకోవాలని, కాంగ్రెస్‌కు పడే ఓట్లను చీల్చాలని టీఆర్ఎస్ భావించింది. కానీ ఆర్టీసీ సమ్మె ఎఫెక్ట్ వల్ల అది కుదిరే అవకాశాలు కనిపించడం లేదు. సమ్మె ప్రభావం ఉపఎన్నికపై ఉంటుందా? లేదా? అనేది ఎన్నికల ఫలితాల వెల్లడి రోజున తేలనుంది.