లాక్‌డౌన్ ఓ రకంగా మంచి చేసింది: తెలంగాణ పోలీసులు

కరోనా వైరస్‌ను కట్టడి చేయడం కోసం దేశవ్యాప్తంగా లాక్‌డౌన్ విధించిన సంగతి తెలిసిందే. లాక్‌డౌన్ కారణంగా ప్రజలు చాలా ఇబ్బంది పడుతున్నారు. ఆర్థిక రంగంపై తీవ్ర ప్రభావం పడుతోంది. కానీ లాక్‌డౌన్ ఓ రకంగా మంచే చేసిందంటున్నారు తెలంగాణ పోలీసులు. లాక్‌డౌన్ సమయంలో క్రైమ్ రేటు గణనీయంగా తగ్గిందని తెలంగాణ డీజీపీ మహేందర్ రెడ్డి తెలిపారు. జనం రోడ్లు ఎక్కకపోవడంతో.. స్నాచింగ్ (గొలుసు దొంగతనాలు) రేటు సున్నాకు పడిపోయిందని డీజీపీ తెలిపారు.

మార్చి 1-21 తేదీల మధ్య 10 స్నాచింగ్ కేసులు నమోదు కాగా.. మార్చి 22 నుంచి ఏప్రిల్ 9 వరకు ఒక్క స్నాచింగ్ కేసు కూడా నమోదు కాలేదు. వాహనాల దొంగతనాలు, కిడ్నాప్‌లు, దొంగతనాలు, రేప్‌ కేసులు.. ఇలా పలు నేరాలు గణనీయంగా తగ్గాయి.
తెలంగాణలో మార్చి 1 నుంచి మార్చి 21 వరకు మొత్తం 764 కేసులు కాగా, మార్చి 22 నుంచి ఏప్రిల్ 9 వరకు 162 కేసులు మాత్రమే నమోదయ్యాయి. దీనికి సంబంధించిన వివరాలను తెలంగాణ పోలీస్ శాఖ విడుదల చేసింది.