Biodiversity Flyover: ట్రాఫిక్ పోలీసుల కీలక సూచనలు

హైదరాబాదీలను వణికించిన కారు ప్రమాదం తర్వాత.. మూసివేతకు గురైన బయోడైవర్సిటీ ఫ్లై ఓవర్ శనివారం తిరిగి ప్రారంభమైంది. 2019 నవంబర్ 23న బయోడైవర్సిటీ ఫ్లైఓవర్‌ మీద ఓవర్ స్పీడ్‌తో దూసుకెళ్లిన కారు.. కిందపడటంతో ఓ మహిళ మరణించగా.. ఆరుగురు గాయాలపాలైన సంగతి తెలిసిందే. డిజైనింగ్ లోపాలపై విమర్శలు రావడంతో ఫ్లైఓవర్‌ను తాత్కాలికంగా మూసివేశారు. ఫ్లైఓవర్‌ను తిరిగి తెరవడం కోసం నిపుణుల కమిటీ సూచనలను జీహెచ్ఎంసీ అమలు చేసింది.

ఫ్లైఓవర్‌పై సెల్ఫీలు తీసుకోవడాన్ని ఇప్పటికే నిషేధించగా.. ఓవర్ స్పీడ్‌తో వెళ్లే వారికి రూ.100 ఫైన్ విధిస్తామని ట్రాఫిక్ పోలీసులు తెలిపారు. ఫ్లై ఓవర్ మీద ప్రయాణించేటప్పుడు లేన్ డిసిప్లెయిన్ పాటించాలని.. గరిష్టంగా గంటకు 40 కి.మీ. వేగంతోనే ప్రయాణించాలని సైబరాబాద్ ట్రాఫిక్ పోలీసులు వాహనదారులకు సూచించారు. ఎడమ వైపు ఉన్న లేన్లో టూవీలర్లు ప్రయాణించాలని.. మిగతా రెండు లేన్లలో కార్లు, తేలికపాటి వాహనాలను నడపాలన్నారు.
ఎట్టి పరిస్థితుల్లోనూ ఫ్లైఓవర్ మీద వాహనాలను నిలపొద్దని పోలీసులు స్పష్టం చేశారు. భారీ వాహనాలకు ఈ ఫ్లై ఓవర్ మీదుగా ప్రయాణించడానికి అనుమతి లేదన్నారు. అత్యవసర సాయం కోసం 040 - 23002424 నంబర్‌కు లేదా డయల్ 100కు కాల్ చేయాలని సూచించారు.