భద్రాద్రి, యాదాద్రి ఆలయాల్లో దర్శనాలు షురూ..

లాక్‌డౌన్ ఆంక్షలను సడలించడంతో నేటి (జూన్ 8) నుంచి ఆలయాలు తెరుచుకున్నాయి. తెలంగాణలోని ప్రముఖ దేవాలయాలైన భద్రాద్రి, యాదాద్రి, వేములవాడల్లో భక్తుల ప్రవేశానికి అనుమతి ఇస్తున్నారు. థర్మల్ స్క్రీనింగ్ చేపట్టిన తర్వాతే భక్తులను ఆయలంలోకి అనుమతి ఇస్తున్నారు. పదేళ్లలోపు చిన్నారులు, 60 ఏళ్లు పైబడిన వృద్ధులను ఆలయాల్లోకి అనుమతించడం లేదు. ఉదయం 6.30 గంటల నుంచి 11.30 గంటల వరకు భద్రాచలం రామాలయంలోకి భక్తులను అనుమతించారు. తిరిగి మధ్యాహ్నం 3 గంటల నుంచి సాయంత్రం 6.30 గంటల వరకు దర్శనానికి అనుమతిస్తున్నారు. ప్రసాదాలను నేరుగా ప్యాకెట్ల రూపంలో భక్తులకు అందిస్తున్నారు.

భౌతిక దూరం పాటించడంతోపాటు తీర్థం ఇవ్వడం, శఠగోపం పెట్టడం లాంటి వాటికి కొద్ది రోజులపాటు దూరంగా ఉండనున్నారు. ఇక యాదాద్రి లక్ష్మీ నరసింహ ఆలయంలో తొలి రోజు ఉద్యోగులు, విశ్రాంత ఉద్యోగులు, స్థానికులు దర్శించుకునేలా ఏర్పాట్లు చేశారు. తలనీలాలు సమర్పించే కళ్యాణ కట్టను మాత్రం తాత్కాలికంగా మూసివేశారు. దర్శనానికి వచ్చే భక్తులు తప్పనిసరిగా ఆధార్ కార్డ్ తీసుకొని రావాలని సూచించారు. కొండపైకి బస్సులు, ఆటోలు, టూవీలర్లను మాత్రమే అనుమతిస్తున్నారు.