సచివాలయ భవనాల కూల్చివేతకు హైకోర్టు బ్రేక్!

సచివాలయ భవనాల కూల్చివేత విషయమై హైకోర్టు మరోసారి తెలంగాణ ప్రభుత్వానికి షాకిచ్చింది. సోమవారం వరకు కూల్చివేతను నిలిపేయాలని రాష్ట్ర ప్రభుత్వాన్ని ఆదేశించింది. నగరానికి చెందిన సామాజికవేత్త పీఎల్ విశ్వేశ్వరరావు దాఖలు చేసిన పిటిషన్‌ను విచారించిన ధర్మాసనం.. సచివాలయ కూల్చివేతను ఆపాలంటూ మధ్యంతర ఉత్తర్వులు జారీ చేసింది. పూర్తి వివరాలతో కౌంటర్ పిటిషన్ దాఖలు చేయాలని ప్రభుత్వాన్ని ఆదేశించింది.

పాత సచివాలయ భవనాల కూల్చివేతకు జూన్ చివర్లో హైకోర్టు గ్రీన్ సిగ్నల్ ఇచ్చింది. దీంతో వెంటనే స్పందించిన కేసీఆర్ సర్కారు పాత భవనాలను కూల్చివేసే ప్రక్రియను మూడు రోజుల క్రితం ప్రారంభించింది. ఇందుకోసం సచివాలయం వైపు వెళ్లే దారులను మూసివేయడంతోపాటు.. పోలీసులతో బందోబస్తు ఏర్పాటు చేశారు. ఇప్పటికే చాలా వరకు సచివాలయ భవనాల కూల్చివేత పూర్తయ్యింది.

ఇప్పటికే నూతన సచివాలయ నమూనాను కూడా తెలంగాణ ప్రభుత్వం విడుదల చేసింది. రూ.500 కోట్లతో కొత్త సచివాలయం నిర్మాణ పనులను శ్రావణ మాసంలో ప్రారంభించాలని సర్కారు భావిస్తోంది.

Read Also: సచివాలయ శిథిలాలతో దెబ్బతిన్న గుడి, మసీదు