టైర్ మారుస్తున్న డ్రైవర్‌ను చిదిమేసి.. తప్పించుకునే క్రమంలో మరో లారీ కింద పడి..

విధిరాతను మార్చడం ఎవరి తరం కాదు, చేసిన తప్పుకి శిక్ష అనువించక తప్పదు అని పెద్దలు తరచుగా అంటుంటారు. ఈ రెండు మాటలూ అక్షర సత్యాలని నిరూపించే ఘటన నల్గొండ జిల్లా చిట్యాల సమీపంలో జాతీయ రహదారిపై చోటు చేసుకుంది. వివరాల్లోకి వెళ్తే... లారీ వెనుక టైర్ అరిగిపోయిందని గ్రహించిన డ్రైవర్ చిట్యాల మండలంలోని గుండ్రాంపల్లి వద్ద వాహనాన్ని రోడ్డు పక్కన నిలిపాడు.

శనివారం ఉదయం చిట్యాల సమీపంలోని గుండ్రాంపల్లి వద్ద జాతీయ రహదారిపై వెళ్తుండగా ఓ లారీ డ్రైవర్ వెనుక టైర్ పూర్తిగా అరిగిపోయిందని గుర్తించాడు. వాహనాన్ని రోడ్డు పక్కకు తీసి టైర్ మారుస్తుండగా.. వెనుక నుంచి వేగంగా వచ్చిన మరో లారీ అతడి మీది నుంచి వెళ్లిపోయింది. దీంతో అతడు అక్కడికక్కడే ప్రాణాలు కోల్పోయాడు.

దీంతో ప్రమాదానికి కారణమైన లారీ డ్రైవర్ కంగారుపడ్డాడు. అక్కడి నుంచి పారిపోయే క్రమంలో మరో లారీ కింద పడి ప్రాణాలు కోల్పోయాడు. ఒకే చోట ఇద్దరు లారీ డ్రైవర్లు అనూహ్యంగా ప్రాణాలు కోల్పోవడం అక్కడున్న వారిని కలచి వేసింది. ఇద్దరి మృతదేహాలను పోస్టుమార్టం నిమిత్తం రామన్నపేట ఏరియా హాస్పిటల్‌కు తరలించారు.