Hyd: ఆ మందు ఇవ్వలేదని మెడికల్ సిబ్బందిపై తాగుబోతుల దాడి.. వీడియో వైరల్

హైదరాబాద్‌లోని మెహెదీపట్నం వద్ద గల లంగర్ హౌస్ పోలీస్ స్టేషన్ పరిధిలో బుధవారం రాత్రి తాగుబోతులు వీరంగం సృష్టించారు. బాపు ఘాట్ వద్ద ఉన్న ఓ మెడికల్ దుకాణంలోకి వెళ్లి డాక్టర్ ప్రిస్క్రిప్షన్ లేకుండా ఓ మెడిసిన్ ఇవ్వమని అడిగారు. ఇది నిద్ర ముంచుకొచ్చేందుకు వాడే స్లీపింగ్ టాబ్లెట్స్, టానిక్ అని దుకాణదారుడు వాపోయాడు. దానికి మెడికల్ షాప్ యజమాని డాక్టర్ ప్రిస్క్రిప్షన్ లేకుండా ఆ ఔషధం ఇవ్వకూడదని వారికి తేల్చి చెప్పాడు. దీంతో వారు వినకుండా ఒక్కసారిగా మెడికల్ షాప్ లోపలికి ప్రవేశించి నానా హంగామా సృష్టించారు.

అక్కడికి సుమారుగా ఓ పదిమంది వచ్చినట్లు అక్కడే ఉన్న సీసీటీవీ కెమెరాలో రికార్డయింది. దీంతో భయానికి గురయిన మెడికల్ షాపు యజమాని వెంటనే పోలీసులకు ఫిర్యాదు చేశారు. సీసీటీవీ కెమెరా ఆధారంగా నిందితులను పట్టుకునే ప్రయత్నంలో పోలీసులు ఉన్నారు. వారు అడిగిన ఔషధాన్ని వైద్యుడి సలహా లేకుండా ఎట్టిపరిస్థితుల్లోనూ ఇతరులకు విక్రయించకూడదనే నిబంధన ఉంది. ఈ విషయాన్ని దుకాణదారు వారికి నచ్చజెప్పే ప్రయత్నం చేసినా వారు వినకుండా దాడికి పాల్పడ్డారు. దీనికి సంబంధించిన వీడియో వైరల్ అవుతోంది.