కాపలా కుక్కలా ఉంటానన్నారు.. కేసీఆర్‌పై దుబ్బాక ఎమ్మెల్యే సంచలన వ్యాఖ్యలు

గ్రేటర్ ఎన్నికల ప్రచారంలో నాయకులు ఒకరిపై ఒకరు విమర్శల దాడులు చేసుకుంటున్నాయి. ప్రధానంగా బీజేపీ, టీఆర్ఎస్, ఎంఐఎంల మధ్య మాటల యుద్ధం కొనసాగుతోంది. ఈ సందర్భంగా దుబ్బాక ఎమ్మెల్యే రఘునందన్ రావు గ్రేటర్‌లో ప్రచారం నిర్వహించారు. నాచారం డివిజన్ బీజేపీ అభ్యర్థికి మద్దతుగా రఘునందన్ ప్రచారం చేశారు. కేసీఆర్ బీజేపీ పై యుద్ధం ప్రకటిస్తాననడం హాస్యాస్పదంగా ఉందన్నారాయన. అధికారమిచ్చిన ప్రజలకు సేవలందించకుండా.. ఎప్పుడూ ఫామ్ హౌస్ లో ఉండే కేసీఆర్ బీజేపీ పై యుద్ధం ఎలా చేస్తారని ప్రశ్నించారు.

Read More: అక్కడ అల్లర్లకు భారీ ప్లాన్.. ఎన్నికల వాయిదాకు కుట్ర.. కేసీఆర్ సంచలన వ్యాఖ్యలు

కేంద్రం నిధులివ్వకుండా రాష్ట్రంలో జాతీయ రహదారులు ఎక్కడినుండి వచ్చాయో చెప్పాలన్నారు రఘునందన్. TRS పార్టీ లాగా బీజేపీ టిక్కెట్లు అమ్ముకోదన్నారు. హైదరాబాద్‌లో ఇటీవల వచ్చిన వరదలపై కూడా రఘునందన్ సంచలన వ్యాఖ్యలు చేశారు. తెలంగాణ వస్తే కాపలా కుక్కలా ఉంటానన్న కేసీఆర్.. హైదరాబాద్ లో వరద వచ్చి జనం అవస్థలు పడుతుంటే ఎక్కడున్నాడని ప్రశ్నించారు ఎమ్మెల్యే రఘునందన్. టీఆర్ఎస్, ఎంఐఎం రెండు వేర్వరు కాదని రెండు ఒక్కటేనన్నారు. ఈ రెండు పార్టీల్లో దేనికి ఓటు వేసినా ఒక్కటేనన్నారు రఘునందన్. హైదరాబాద్ అభివృద్ధి బీజేపీతోనే సాధ్యం అన్నారాయన. గ్రేటర్‌లో బీజేపీకి ఓటు వేసి గెలిపించాలని కోరారు.