దుబ్బాక ఉపఎన్నిక: భారీగా డబ్బు తరలింపు.. వివాదంలో బీజేపీ అభ్యర్థి

దుబ్బాక ఉప ఎన్నికలో బీజేపీ అభ్యర్థిగా బరిలో నిలిచిన మాధవనేని రఘునందన్‌ రావు ఎన్నికల ముందే ఓ వివాదంలో చిక్కుకున్నారు. అతని అనుచరుల వద్ద పోలీసులు భారీగా సొమ్మును పట్టుకున్నారు. హైదరాబాద్‌ పోలీసుల సమాచారం మేరకు.. మంగళవారం సాయంత్రం శామీర్‌పేటలో రూ.40 లక్షల అక్రమ సొమ్ముతో కొంతమంది వ్యక్తులు పట్టుబడ్డారు. పోలీసులుకు చిక్కిన నలుగురు వ్యక్తులను డీసీపీ పద్మజ విచారణ జరిపారు. దీంతో వారు ఆ డబ్బును రఘునందన్‌ రావుకు ఇచ్చేందుకు తీసుకెళ్తున్నట్లు చెప్పారు.

పటాన్‌చెరు నుంచి సిద్దిపేటకు డబ్బు తరలిస్తుండగా పట్టుకున్నామని డీసీపీ పద్మజ వెల్లడించారు. నిందితులతో రఘునందన్‌రావు పీఏ సంతోష్‌ ఫోన్‌ సంభాషణను కూడా తాము గుర్తించినట్లు వెల్లడించారు. ఎన్నికల నియమావళి, నిబంధనలకు విరుద్ధంగా డబ్బులు తరలిస్తున్న నలుగురిపై పోలీసులు కేసులు నమోదు చేశారు. దుబ్బాక ఉప ఎన్నిక ప్రచారం రోజురోజుకూ వేడెక్కుతుండగా బీజేపీకి అభ్యర్థికి సంబంధించిన అనుచరుల వద్ద పెద్ద మొత్తంలో డబ్బు బయట పడడం సంచలనంగా మారింది.