హుజూర్‌నగర్ ఉప-ఎన్నికకు నోటిఫికేషన్.. నామినేషన్లు షురూ

తెలంగాణలోని హుజూర్‌నగర్ అసెంబ్లీ ఉప-ఎన్నికకు అక్టోబరు 21న పోలింగ్ జరనున్న విషయం తెలిసిందే. దీనికి సంబంధించిన నోటిఫికేషన్‌ను ఎన్నికల కమిషన్ సోమవారం వెలువరించింది. నామినేషన్ ప్రక్రియ నేటి నుంచి మొదలై సెప్టెంబర్ 30తో ముగియనుంది. ఉపసంహరణకు గడువు అక్టోబరు 3 కాగా, పోలింగ్‌ను అదే నెల 21న నిర్వహించి, అక్టోబరు 24న లెక్కింపు చేపడతారు. నామినేషన్ స్వీకరణకు హుజూర్‌నగర్‌ తహసీల్దారు కార్యాలయంలో అధికారులు ఏర్పాట్లు పూర్తి చేశారు. ఎన్నికల కోడ్‌ దృష్ట్యా ఎన్నికలు పక్కాగా నిర్వహించేందుకు అవసరమైన కమిటీలను నియామకాన్ని జిల్లా ఎన్నికల అధికారి అమయ్‌కుమార్‌ పూర్తి చేశారు.

కమిటీ ఇంచార్జులు, సభ్యులతో ఆయన ఆదివారం సమావేశం ఏర్పాటు చేశారు. ఎన్నికలను పారదర్శకంగా నిర్వహించేందుకు కృషి చేయాలని అధికారులను జేసీ కోరారు. ఆర్వో, ఏఆర్వోలు హుజూర్‌నగర్‌లో మకాం వేయాలని పేర్కొన్నారు. రెండు రాష్ట్రాల సరిహద్దు ప్రాంతం కావడంతో భద్రత ఏర్పాట్లపై అధికారులు ప్రత్యేక దృష్టి పెట్టారు.
కాగా, షెడ్యూల్ వెలువడిన రోజే కాంగ్రెస్‌ నేతలు ఉత్తమ్‌కుమార్‌రెడ్డి, జానారెడ్డి కలిసి ప్రచారాన్ని ప్రారంభించారు. టీఆర్ఎస్ సైతం తమ అభ్యర్థిని ప్రకటించి దూకుడు మీద ఉంది.

టీఆర్ఎస్ వర్కింగ్ ప్రెసిడెంట్, మంత్రి కేటీఆర్‌ సోమవారం నల్గొండలో పర్యటిస్తున్నారు. ఉప ఎన్నిక నేపథ్యంలో ఆయన పర్యటనకు ప్రాధాన్యం ఏర్పడింది. హుజూర్‌నగర్‌ ఎన్నికల బాధ్యతలను ఆయనే పర్యవేక్షిస్తారని తెలుస్తోంది. పర్యటనలో భాగంగా ఆయన జిల్లా నాయకులు, ఎమ్మెల్యేలతో సమావేశమవుతారని తెలిసింది. గెలుపు కోసం అనుసరించాల్సిన వ్యూహాలపై శ్రేణులకు దిశానిర్దేశం చేయనున్నట్టు సమాచారం. టిక్కెట్టు లభించడంతో సైదిరెడ్డి నేరేడుచర్ల నుంచే ప్రచారాన్ని ప్రారంభించారు. ఆయనకు కార్యకర్తలు ఘనస్వాగతం పలికారు. నేరేడుచర్ల నుంచి హుజూర్‌నగర్‌ వరకు భారీ ద్విచక్రవాహన ర్యాలీ చేపట్టారు.