‘విద్యార్థినుల బట్టల్లోకి జెర్రులు.. బాత్రూముల్లో తేళ్లు..’ ఆర్‌ఎస్ ప్రవీణ్ ఆగ్రహం

బహుజన నినాదంతో రాజకీయాల్లోకి ఎంట్రీ ఇచ్చిన మాజీ ఐపీఎస్ అధికారి, బీఎస్పీ రాష్ట్ర కన్వీనర్ ఆర్‌ఎస్ ప్రవీణ్ కుమార్ మరోమారు కేసీఆర్ సర్కార్‌పై తీవ్రస్థాయిలో విరుచుకుపడ్డారు. విద్యావ్యవస్థపై టీఆర్‌ఎస్ సర్కార్ నిర్లక్ష్యం వహిస్తోందని ఆయన ధ్వజమెత్తారు. బట్టల్లోకి జెర్రులు, బాత్రూముల్లో తేళ్లు వస్తున్నాయని.. బయటకు రావాలంటేనే భయమేస్తోందంటూ మహాత్మ జ్యోతిరావుపూలే పాఠశాల విద్యార్థినులు ఆందోళన చేయడంపై ఆర్ఎస్ ప్రవీణ్ స్పందించారు. ప్రభుత్వంపై ఘాటు విమర్శలు చేశారు.

బంగారు తెలంగాణలో టీఆర్‌ఎస్ పాలన విద్యావ్యవస్థకు ముమ్మాటికీ చీకటిపర్వమని ప్రవీణ్ మండిపడ్డారు. యూనివర్సిటీల్లో బోధకులు లేరని, పాఠశాలలో విద్యావాలంటీర్ల కొరత, గురుకులాలకు సొంత భవనాలు లేవని ఆయన అన్నారు. ఈ పాలకులు తెలంగాణ భావితరాల భవిష్యత్తును ఛిద్రం చేశారని ఆయన ఆవేదన వ్యక్తం చేశారు. బహుజన రాజ్యంతోనే విద్యావ్యస్థలో వెలుగొస్తుందని ఆయన అన్నారు.

కరీంనగర్ జిల్లా గన్నేరువరం మండలంలోని గుండ్లపల్లిలోని మహాత్మజ్యోతిరావుపూలే బాలికల రెసిడెన్షియల్ పాఠశాల విద్యార్థినులు, వారి తల్లిదండ్రులతో కలసి పాఠశాల ఎదుట ఆందోళనకు దిగడం చర్చనీయాంశమైంది. పాఠశాలలో వసతులు అధ్వానంగా ఉన్నాయని.. జెర్రులు, తేళ్లు తిరుగుతున్నాయని.. బయటికి రావాలంటేనే భయమేస్తోందని విద్యార్థినులు వాపోతున్నారు. తల్లిదండ్రులతో కలసి రాజీవ్ రహదారిపై ధర్నా చేశారు.



Also Read: