Huzurabad: కేసీఆర్, హరీశ్‌పై ఈటల ఫైర్.. అంత మాట అనేశారే.!

ఎప్పుడెప్పుడా అని ఎదురుచూస్తున్న హుజూరాబాద్ ఉప ఎన్నిక షెడ్యూల్ రానుండడంతో ఒక్కసారిగా రాజకీయం వేడెక్కింది. కొద్దిరోజులుగా స్తబ్దుగా ఉన్న నేతలు మళ్లీ స్వరం పెంచారు. ప్రజాక్షేత్రంలో దూసుకుపోయేందుకు పావులు కదుపుతున్నారు. ప్రత్యర్థులపై మాటల తూటాలతో విరుచుకుపడుతున్నారు. టీఆర్‌ఎస్‌కి రాజీనామా చేసి బీజేపీలో చేరిన మాజీ మంత్రి ఈటల రాజేందర్ స్పీడు పెంచారు. అధికార టీఆర్‌ఎస్ పార్టీ, సీఎం కేసీఆర్, మంత్రులను టార్గెట్ చేస్తూ ఘాటు వ్యాఖ్యలు చేశారు.

ఉప ఎన్నిక కోసం నీచ రాజకీయాలు చేస్తున్నారంటూ ఈటల ధ్వజమెత్తారు. ఎక్కడా లేని విధంగా నియోజకవర్గంలో ప్రలోభాలకు గురిచేస్తున్నారని మండిపడ్డారు. నీచులు.. పరమ నీచులు నీచ రాజకీయం చేస్తున్నారని ఆయన ఆగ్రహం వ్యక్తం చేశారు. అధికార పార్టీ ఎలాంటి ప్రలోభాలకు గురిచేసినా హుజూరాబాద్ ప్రజలు ఈటలను గెలిపించేందుకు సిద్ధంగా ఉన్నారని.. మహిళలు, యువకులు, పెద్దలు అందరూ తన వెంటే ఉన్నారని ఆయన ధీమా వ్యక్తం చేశారు. ఇది కేసీఆర్ అహంకారానికి.. హుజూరాబాద్ ప్రజల ఆత్మగౌరవానికి జరుగుతున్న పోటీ అని ఆయన అభివర్ణించారు.

మాజీ సహచరుడు, మంత్రి హరీష్ రావుపై మరోమారు తీవ్రస్థాయిలో మండిపడ్డారు. మంత్రి ప్రజాస్వామ్య విలువలను అపహాస్యం చేస్తున్నారని దుయ్యబట్టారు. పోలీసులతో బీజేపీ నేతలను భయపెట్టే ప్రయత్నాలు చేస్తున్నారని.. నీచ రాజకీయం చేస్తున్నారని ఈటల అన్నారు. టీఆర్‌ఎస్ నీచపు పార్టీ అని.. ఆ పార్టీ నేతలు నీచపు మనుషులని ఆగ్రహం వ్యక్తం చేశారు. ఎన్నికల్లో గెలుపు కోసం దొంగ ఓట్లు చేర్చుతున్నారని ఆయన ఆరోపించారు.

Also Read: