ఆయిల్ ట్యాంకర్లే టార్గెట్.. నకిలీ విజిలెన్స్ అధికారుల ముఠా గుట్టురట్టు

ఆయిల్ ట్యాంకర్ల యజమానులను టార్గెట్ చేసుకొని విజిలెన్స్ అధికారులమంటూ దోపీడీకి పాల్పడుతున్న అంతరాష్ట్ర దొంగల ముఠాను భువనగిరి ఎస్‌వోటీ పోలీసులు అరెస్టు చేశారు. ఈ ఘటన యాదాద్రి భువనగిరి జిల్లాలో బుధవారం చోటు చేసుకుంది. వివరాల్లోకి వెళితే.. ఆంధ్రప్రదేశ్‌లోని అనంతపురం జిల్లాకు చెందిన ఫజిల్ రెహ్మన్ అనే వ్యక్తి ఆరుగురు సభ్యులతో కలిసి ఒక ముఠాను ఏర్పాటు చేసుకున్నాడు.

ముఠా సాయంతో ఆయిల్ ట్యాంకర్ల యజమానులను టార్గెట్ చేసుకొని విజిలెన్స్ అధికారుల పేరుతో దాడులు చేస్తున్నాడు. కల్తీ ఆయిల్ సరఫరా చేస్తున్నారంటూ యజమానులను బెదిరించి రూ. లక్షల్లో వసూళ్లకు పాల్పడుతున్నారు. ఈ క్రమంలోనే ఘట్కేసర్ పోలీస్ స్టేషన్ పరిధిలో ఓ ఆయిల్ ట్యాంకర్‌ను ఆపి, రూ. 6 లక్షలు దోపిడీ చేశారు. ఈ ఘటనపై సమాచారం అందుకున్న ఘట్కేసర్ పోలీసులు భువనగిరి ఎస్‌వోటీ పోలీసుల సహాయంతో నిఘా వేసి ముఠాను అదుపులోకి తీసుకున్నారు.

Read Also: విద్యార్థినితో లెక్చరర్ ప్రేమ పెళ్లి.. తర్వాత అసలు విషయం తెలిసి..

వారి వద్ద నుంచి రూ. 8.80 లక్షల నగదుతోపాటు, టాటా ఇండికా కారు, 8 సెల్‌ఫోన్లు స్వాధీనం చేసుకున్నారు. అనంతరం వారిని రిమాండ్‌కు తరలించారు. పోలీసుల విచారణలో ఈ ముఠాకు మరో మూడు నేరాలతో సంబంధం ఉన్నట్లు తెలిసింది. ముఠాను పట్టుకున్న ఘట్కేసర్, భువనగిరి ఎస్‌వోటీ పోలీసులను రాజకొండ అడిషనల్ పోలీస్ కమిషనర్ సుధీర్ బాబు అభినందించారు.