రెవెన్యూ సిబ్బందిపై మరో పెట్రో దాడి

అబ్దుల్లాపూర్‌మెట్ ఎమ్మార్వో విజయా రెడ్డి హత్యోదంతం నేపథ్యంలో రాష్ట్రంలో రెవెన్యూ సిబ్బందిపై దాడి ఘటనలు పెరుగుతున్నాయి. భూ సమస్యను పరిష్కరించడం లేదని ఆగ్రహించిన ఓ రైతు రెవెన్యూ కార్యాలయంలో పెట్రోలుతో వీరంగం సృష్టించిన ఘటన కరీంనగర్ జిల్లాలో చోటు చేసుకుంది. చిగురుమామిడి మండలం లంబాడిపల్లి గ్రామానికి చెందిన కనకయ్య అనే రైతు మంగళవారం (నవంబర్ 19) ఉదయం రెవెన్యూ సీనియర్ అసిస్టెంట్‌, ఇతర సిబ్బందిపై పెట్రోల్ పోసే ప్రయత్నం చేశాడు.

రైతు కనకయ్య పెట్రోలుతో దాడికి సిద్ధమవడాన్ని గమనించిన రెవెన్యూ సిబ్బంది అప్రమత్తమయ్యారు. తమ స్థానాల నుంచి లేచి పరుగెత్తారు. దీంతో అక్కడి కంప్యూటర్, కుర్చీలపై పెట్రోల్ పడింది. వెంటనే అప్రమత్తమైన రెవెన్యూ సిబ్బంది పోలీసులకు సమాచారం ఇచ్చారు. రెవెన్యూ కార్యాలయానికి వచ్చిన పోలీసులు రైతు కనకయ్యను అదుపులోకి తీసుకొని విచారిస్తున్నారు.

Must Read: పాకిస్థాన్‌లో తెలుగు యువకుడి అరెస్టు.. వీడియో రిలీజ్

సీనియర్ అసిస్టెంట్ రామచంద్రన్, ఇతర సిబ్బందిపై రైతు కనకయ్య పెట్రోల్‌తో దాడికి యత్నించినట్లు రెవెన్యూ సిబ్బంది తెలిపారు. తన భూమికి సంబంధించిన పట్టా జారీ చేయకపోవడంతోనే ఈ దాడికి పాల్పడినట్లు రైతు కనకయ్య చెబుతున్నాడు. పట్టా కోసం మూడేళ్లుగా ఎమ్మార్వో కార్యాలయం చుట్టూ తిరుగుతున్నానని ఆవేదన వ్యక్తం చేశాడు.

భూమిపై అన్నదమ్ముల మధ్య వివాదం నడుస్తోందని.. ఆ కారణంగానే పట్టాలు ఇవ్వలేదని తహశీల్దార్‌ కార్యాలయ సిబ్బంది చెబుతున్నారు. రైతు కనకయ్య పక్కా ప్రణాళికతోనే దాడి చేయడానికి వచ్చాడని.. మంగళవారం ఉదయం 10 గంటల నుంచే పెట్రోలు బాటిల్‌తో ఎమ్మార్వో కార్యాలయం ముందు వేచి చూస్తున్నాడని సిబ్బంది తెలిపారు. ఇలాంటి దాడులతో పని చేయాలంటేనే భయమేస్తోందని రెవెన్యూ సిబ్బంది ఆందోళన వ్యక్తం చేస్తున్నారు. ఘటనకు సంబంధించిన పూర్తి వివరాలు తెలియాల్సి ఉంది.

Watch: జీడిమెట్ల కెమికల్ ఫ్యాక్టరీ పేలుడు విషాద దృశ్యాలు