హైదరాబాద్‌లో భవనాల కూల్చివేత డ్రైవ్.. ఓనర్లకు నోటీసులు జారీ

హైదరాబాద్ నగర పాలక సంస్థ పాత భవనాల కూల్చివేత కోసం ప్రత్యేక డ్రైవ్ చేపట్టింది. నగరంలో ప్రమాదకర స్థాయిలో ఉన్న భవనాలను గుర్తించి వాటిని బుల్డోజర్‌ల సాయంతో కూల్చి వేస్తున్నారు. ఇందులో భాగంగా జంట నగరాల్లో దాదాపు 60 పాత భవంతులను బల్దియా గుర్తించింది. ఇది దాదాపు 70 ఏళ్ల నాడు కట్టినవిగా గుర్తించారు.

రాబోయేది వానాకాలం కావడంతో ముందస్తు జాగ్రత్త చర్యల్లో భాగంగా జీహెచ్ఎంసీ ఈ ప్రత్యేక డ్రైవ్‌ను చేపట్టింది. హైదరాబాద్‌లోనే కాక, కొన్ని చోట్ల గతంలో పాత భవనాలు కూలిన ఘటనలు చోటు చేసుకున్న సంగతి తెలిసిందే. వానాకాలం వర్షాలకు పాత భవంతులు నానిపోయి సత్తువ కోల్పోయి కూలిన ఘటనలు కూడా వెలుగు చూశాయి. ఈ క్రమంలో కొంత మంది ప్రాణాలు కోల్పోవడం, మరికొంత మంది గాయాలపాలు కావడం జరిగింది.

‘‘2016లో చేసిన సర్వే ప్రకారం బేగంపేట్‌లో 150 వరకూ పాత భవంతులు, తార్నాకలో మరో 95 పురాతన కట్టడాలను గుర్తించాం. వీటన్నింటినీ మేం విడతల వారీగా కూల్చే పని చేపట్టబోతున్నాం. ఈ పాత భవంతులన్నీ దశాబ్దాల క్రితం మట్టి, ఇటుకలతో నిర్మించినవి. ఎండలు, వానలకు ఆ కట్టడాలు నానిపోయి శిథిలావస్థకు చేరుకున్నాయి. వీటిని ఇలాగే వదిలేస్తే ప్రమాదాలు జరిగే అవకాశం ఉంది.’’ అని జీహెచ్ఎంసీ నగర ప్రణాళిక విభాగం అధికారి మోహన్ వెల్లడించారు.

ఈ భవనాలకు సంబంధించిన యజమానులకు ఇప్పటికే జీహెచ్ఎంసీ నోటీసులు ఇచ్చింది. వీరిలో కొంత మంది తమ భవనాలను రీమోడలింగ్ చేయించుకొని, ఫిట్‌నెస్ సర్టిఫికెట్ పొందుతామని చెబుతున్నారు.