ప్రియుడి మృతి.. తట్టుకోలేక ప్రియురాలి ఆత్మహత్య

ఇటీవలే ప్రియురాలి మృతిని తట్టుకోలేని ప్రియుడు ఆమె సమాధి వద్దే ఆత్మహత్యకు పాల్పడ్డాడు. ఈ ఘటన జయశంకర్‌భూపాల్‌పల్లి జిల్లాలో జరిగింది. అయితే ఇలాంటి విషాదకరమైన ఘటనే మరోకటి జరిగింది. అయితే ఇక్కడ ప్రియురాలు బలవన్మరణానికి పాల్పడింది. తాను ప్రేమించిన వ్యక్తి అకాల మరణాన్ని తట్టుకోలేక ఉరేసుకొని ఆత్మహత్య చేసుకుంది. ఈ ఘటన హైదరాబాద్ నాగోల్‌లో జరిగింది. మహారాష్ట్రకు చెందిన యువతి నగరానికి వచ్చి స్థానిక యువకుడిని ప్రేమించింది. పెద్దల కూడా అంగీకరించడంతో వారి పెళ్లికి కూడా ముహుర్తం ఫిక్స్ అయ్యింది. అయితే విధి మాత్రం వీరి విషయంలో చిన్నచూపు చూసింది. మరో రెండు రోజుల్లో పెళ్లి ఉందనగానే... ప్రియుడు కరెంట్ షాక్ తగిలి మృతి చెందాడు.

దీంతో తీవ్ర మనస్తాపానికి గురైన యువతి .. శుక్రవారం ఉరేసుకొని తనువు చాలించింది. ఎల్బీనగర్‌ ఠాణా పరిధిలో ఈ ఘటన చోటుచేసుకుంది. మహారాష్ట్రకు చెందిన సుస్మిత (23) పారిపోయి నగరానికి వచ్చి బోడుప్పల్‌లోని హాస్టల్‌లో ఉంటోంది. నాగోలు సమీప మల్లికార్జుననగర్‌కు చెందిన కల్యాణ్‌తో ఈ క్రమంలో పరిచయం ఏర్పడింది. ఇద్దరూ పరిచయం ప్రేమకు దారితీసింది. పెళ్లి కూడా చేసుకోవాలని నిర్ణయించుకున్నారు. ఇంట్లో ఉన్న పెద్దల్ని కూడా ఒప్పించారు. పెద్దల సమ్మతితో ఈ జంట ఆగస్టులో నిశ్చితార్థం కూడా చేసుకుంది.

Read More: తమ్ముడి కోసం ఊయల కట్టాడు... అదే అన్న ప్రాణం తీసింది

పెళ్లి తేదీ ముహుర్తం కూడా నిర్ణయించారు. అయితే మరో రెండ్రోజుల్లో పెళ్లి అనగా.. విద్యుదాఘాతంతో కల్యాణ్‌ మృతి చెందాడు. దీంతో సుస్మిత తీవ్ర మనస్తాపానికి గురైంది. రెండేళ్ల క్రితమే కల్యాణ్‌ తల్లి మరణించగా.. అతని తండ్రితోపాటు అదే ఇంట్లో ఉంటూ కల్యాణ్‌ ఆలోచనలతోనే గడపసాగింది. శుక్రవారం ఇంట్లో ఎవరూ లేని సమయంలో పైకప్పునకు చీరతో ఉరేసుకొంది. ఎల్బీనగర్‌ పోలీసులు ఘటనాస్థలానికి చేరుకుని వివరాలు సేకరించి కేసు నమోదు చేశారు. మృతదేహాన్ని పోస్టుమార్టం నిమిత్తం ఉస్మానియా ఆస్పత్రికి తరలించారు.