అమిత్ షాతో తెలంగాణ గవర్నర్ భేటీ.. తమిళిసైకి ప్రధాని అభినందనలు

తెలంగాణ గవర్నర్ తమిళిసై సౌందరరాజన్.. కేంద్ర హోం శాఖ మంత్రి అమిత్ షాతో భేటీ అయ్యారు. ఢిల్లీ పర్యటనలో ఉన్న తమిళిసై మంగళవారం (అక్టోబర్ 15) రాత్రి అమిత్ షాతో సమావేశమయ్యారు. రాష్ట్రంలోని తాజా పరిస్థితులను హోం మంత్రికి వివరించినట్లు సమాచారం.

తెలంగాణ గవర్నర్‌గా తాను పాల్గొన్న సామాజిక కార్యక్రమాలు, బతుకమ్మ సంబరాలపై అమిత్ షాకు గవర్నర్ తమిళిసై ప్రతులను సమర్పించారు. అంతకుముందు ఆమె ప్రధాని నరేంద్ర మోదీతో భేటీ ఆయ్యారు. ఈ సందర్భంగా రాజ్‌భవన్‌లో చేపట్టిన వినూత్న అంశాలపై ప్రధానికి నివేదిక అందించారు.

రాజ్‌భవన్‌లో తాను చేపట్టిన ప్లాస్టిక్ నిషేధం, యోగా తరగతులు, రక్తదానశిబిరం తదితర కార్యక్రమాలపై ప్రధానికి నివేదిక ఆందించగా.. గవర్నర్‌ తమిళిసైని ఆయన అభినందించారు. గవర్నర్‌గా బాధ్యతలు చేపట్టిన తర్వాత తమిళిసై ప్రధానితో భేటీ కావడం ఇదే తొలిసారి కావడం గమనార్హం. ఆర్టీసీ సమ్మెతో తెలంగాణ అట్టుడుకుతున్న నేపథ్యంలో గవర్నర్ తమిళిసై.. ప్రధాని మోదీ, హోం మంత్రి అమిత్ షాను కలవడం ప్రాధాన్యం సంతరించుకుంది.